Ngoenzneix, daxmeh duzbit siengj daiq gyoengq bit iq bae gwnz gai guhcaemz, gyoengq bit iq dingq le, angq raixcaix, nyaenx mbouj ndaej bekbek fwed, miz di angq ndaej diuq hwnjdaeuj, gyoengqde angq dwk hemq “bit bit bit”. Couh yienghneix, gyoengq bit iq riengz laeng daxmeh, baiz baenz coij ndeu, ngauzngauz ngednged bae gai guhcaemz lo.

Gwnz gai caen dwg nauhyied, gijmaz doxgai cungj miz gai. Gwnz loh miz haujlai ci hai bae hai dauq, hix miz haujlai vunz baebae dauqdauq, mwngz caenx gou, gou caenx mwngz. Gyoengq bit iq coengzlaiz mbouj raen gvaq cingzgingj nauhyied yienghneix, gyoengqde gizhaenx muenghmuengh, gizneix yawjyawj. Lwgda mbouj yawj loh, byaij dwk byaij dwk, “budung! Budung……”. Gyoengq bit iq baenz- lawz hix diuq mbouj ndaej hwnjdaeuj, simgip dwk hemq “bit bit bit……”. Daxmeh duzbit dingqnyi sing lwg de hemq, ngeux gyaeuj gvaqdaeuj baez yawj, yi? Lwg gou ndonj haeuj gizlawz bae la? Baenzlawz mbouj raen ne? Duz bitmeh buet dauqbae yawj. A! Yienzlaiz gyoengqde doek roengz aengumz laeg bae lo! Baenzlawz guh ne? Baenzlawz guh ne? Bit daxmeh simgip ndaej lumj duzmoed gwnz rek ndat nei. Deng! Ra vunz daeuj bang! Ra bouxlawz ne? Daxmeh duzbit ngiengx gyaeuj yawjraen liz de mbouj gyae miz boux gingjcaz he. Deng, couh bae ra gingjcaz ba. Daxmeh duzbit lumj mbin ityiengh buet daengz baihnaj gingjcaz, youh bek fwed youh aeu bak nap gingjcaz:“Gatgat- gat……” Mienh hemq mienh rag gingjcaz byaij coh giz gumz laeg bit iq doek roengz haenx, gingjcaz mbouj rox gijmaz eiqsei, hoeng hix riengz bitmeh byaij bae. A!Gingjcaz baez raen bitlwg doek ndaw gumz laeg, hix nyaenx mbouj ndaej saetsing hemq hwnjdaeuj lo. Baenzlawz guh ne? Gingjcaz ngeix le yaep ndeu, a, miz lo! Aeu diuzcag cug aen lamz cuengq roengzbae hawj gyoengq bitlwg diuq ndaw bae caiq rag hwnjdaeuj. Hoeng, dang de yienghneix guh seiz, bit iq baenzlawz hix mbouj diuq haeuj ndaw lamz bae. Gingjcaz youh caiq siengj aen fuengfap ndeu, cug din bitmeh le cuengq roengz ndaw lamz ba…… Bitlwg yawjraen daxmeh de youq ndaw lamz, cungj diuq haeuj ndaw lamz bae lo.

Seizneix, gwnz loh gaenq dingz le haujlai ci, daxmeh duzbit caeuq gyoengq bit iq yiengq gyoengqvunz ngaekngaek gyaeuj, bekbek fwed, bitbitbit, bitbitbit…… lumj yiengq gyoengqvunz docih ne. Doeklaeng bit iq youh riengz laeng bitmeh ngauz- ngauz ngednged byaij ma ranz lo.

(指导老师 龙庆煜)