Ceiqgaenh, laengdin gou ok- yienh geij naed banqnding, mbouj in mbouj humz, hoeng daxmeh nyengh daiq gou bae yihyen genjcaz.

Youq ndaw yaenqsiengq gou, haeuj yihyen couh dangq “bae dajcim”, ndigah, baez yamq haeuj aending mwnzcinj yihyen, gou couh laulili. Gou nod song cik ga, mbouj cingznyienh saek di riengz laeng daxboh daxmeh, caen dwg yamq- yamq simdiuq ya.

Gvahau ndaej le, dou daeuj- daengz bizfuhgoh. Naengh youq dangqnaj canghyw, gou ngaizngaiz ngednged duet haiz caeuq duet mad. Canghyw riuj hwnj faj din gou, sijsaeq ngonzyawj gij banqnding haenx, youh heuh daxboh yungh fwngz naenx roengzbae, lij cam gijwnq cingzgvang dem. Doeklaeng, de cibfaen haengjdingh doiq dou naeuz:“Dwg gyakaeuj. Danghnaeuz dwg gominj couh mbouj suenq naek, gwn di ywgominj couh ndaej lo.” Gou baez dingqnyi mbouj yungh dajcim, ndaw hoz gag riungoemx. Danhseih gou angq ndaej daiq caeux lo, aenvih canghyw youh naeuz:“Vihliux dawzcinj di, genyi guh baez lwed cangzgveih genjcaz ndeu, aenvih gyakaeuj yungzheih sieng daengz aenmak.” Gijmaz? Gou cungj deuz mbouj gvaq dajcim.

Gou fwngz gaem song mbaw vanendanh, doeknaiq segseg gaen laeng daxboh daxmeh daengz dieg aeu lwed. Dieg aeu lwed dauqcawq dwg gij sing daej lwgnyez, gij sing bohmeh nai lwgnyez, gijneix hawj gou engq lau lo. Mwh baizdoih, fajfwngz gou saenzdwddwd, miz geij baez lwnz daengz gou, gou cungj ndoj haeuj raeb boux gaenlaeng bae, doeklaeng, gou lij dwg cengqgengz gyaeujndongj sim diuqbubbub ndwn daengz dangqnaj dieg aeu lwed bae. Seiz fag cim baek haeuj gij naeng gou yaephaenx, gou baez haebfaenz, lwed cix aeu ndaej lo! Yi, gaenbonj mbouj raen baenzlawz in, yawj daeuj, gou dwg simvueng gvaqmauh lo.

Baez ceiq dwglau haenx gvaq- bae lo, caen hawj vunz sim’angq, gou gijmaz saeh cungj mbouj miz, caenh gwn di ywgominj couh ndaej lo. Ginggvaq gienh saeh neix le, gou caiq hix mbouj lau dajcim lo.

(bouxsij seiq nienzgaep Loz Veizyih bouxhoiz:Goenggen）