Youq seiziq gou, boux gou ceiq haengjgyaez caeuq boiqfug haenx dwg meh nax mbouj roxnaj ndeu.

Ndwenngux ngoenz banringzgvaq ndeu, mbwn oem raixcaix, gou caeuq daxmeh naengh ci bae ranz bohnax lajmbanj guhcaemz. Youq baihnaj gou naengh dwk meh nax byoem dinj ndeiyawj ndeu, de daenj geu buh hoengzmaeq. Gou doiq daxmeh gangj：“Geu buh mehnax caen gyaeundei ha.”Mehnax cienqndang yiengq gou ngaek gyaeuj riu lo. Aenci hai hwnj diuz lohbya vanvan ngutngut bae, daenh lai lo. Gvaq yaep ndeu, gou roxnyinh gyaeuj ngunhsumsum, naemj rueg, gou ngamq dajsuenq cienq gvaq cuengci bae, hoeng, lij dwg nyaenx mbouj ndaej “va” sing ndeu, rueg ok gij huquq sinz bae baihnaj, sinz daengz raeblaeng geubuh gyaeundei mehnax lo. Gou naemj dai lo, haengjdingh ngaiz mehnax ndaq lo. Daxmeh doq ganjgip aeu soujgaen daeuj uet geu buh mehnax, doq doiq mehnax gangj:“Doiq mbouj hwnj, doiq mbouj hwnj!”Mehnax duet geu buh uq roengz, daj ndaw daehriuj dawz ok geu buh doiq saek ndeu daenj hwnj, yienzhaeuh riu dwk naeuz：“Lwgnyez ngunh ci cij ngaiz rueg, de youh mbouj dwg daegdaengq, mbouj youqgaenj.”Gangj sat, de lij daj gyang daeh dawz ok song naed yw’ngunhci hawj gou gwn, daxmeh lienzsing naeuz：“Gyo- mbaiq！Gyo’mbaiq!”Gwn gvaq yw, gou roxnyinh ndei di lo. Mehnax cam gou：“Nuengxiq, seizneix ndei di caengz?”Gou ngaekngaek gyaeuj. De youh daj gyang daeh dawz ok aen makbingzgoj youh hung youh nding ndeu hawj gou gwn. Gou yawjyawj mehnax unqswnh neix, youh yawjyawj aenmak gyang fwngz, sim naemj: Meh nax neix geij ndei ha! Gyoengqvunz gwnz ci hix yawj coh de, da cungj dwg haenhndei. Ci daengz camh lo, caezgya hix roengz ci lo, gou yiengq mehnax gingq le aen laex ndeu.

Gou yawj dwk raeblaeng mehnax hungsang byaij gyae, ndaw sim majok cungj gamjcingz maijgyaez caeuq gingqcungh ndeu!

(bouxsij: Fouzcoh bouxhoiz: Ouh Caijfangh)