Miz ngoenz ndeu, lauxsae hawj gyoengq doengzhag gangjgangj gij lijsiengj swhgeij. Gou naeuz: “Gou siengj dang boux cozgyah he.” Lauxsae naeuz: “Mingzhauz, lijsiengj mwngz gig ndei, hoeng baenz boux cozgyah he mbouj yungzheih. Cozgyah cungj dwg gij vunz gwn gvaq raemxmaeg, ndaw dungx miz raemxmaeg gig lai.” Gou naeuz: “Lauxsae, neix heih lai lo, gou heuh boh gou lai cawx geij bingz raemxmaeg, gou gwn lai di, ndaw dungx raemxmaeg couh lai lo, neix mbouj couh baenz boux cozgyah luma?” Daengx ban doengzhag cungj riu lo. Lauxsae naeuz: “Eiqsei lai gwn raemxmaeg dwg lai hagsib, lai doegsaw, lai dem cihsiz.”

(ngeih nienzgaep Cangh Mingzhauz)