Ngoenzhaenx, duzmoed Diemj- diemj caeuq Mozmoz cingq youq ndaw ranz guhcaemz. Boh’au Duzmoed byaij haeuj ranz daeuj, naeuz: “Song lwg mwngz, raeuz yaek caeuq duzrwi hai baez hoihlienzvuen he, siengj baij song boux sou ndawde boux he guh bouxlienzloz duzrwi, sou byawz yaek bae ha?”

“Gou bae, gou bae!” Diemjdiemj caeuq Mozmoz ciengj dwk naeuz.

“Yienghneix gou couh gaujgauj sou, byawz dap doiq le couh hawj byawz bae.” Boh’au duzmoed naeuz, “Duzmoed camgya hoihlienzvuen haenx beij duzrwi lai 12 duz, duzmoed caeuq duzrwi gak gemj bae 6 duz le, gij soq duzmoed dwg duzrwi 2 boix. Duzmoed caeuq duzrwi camgya hoih- lienzvuen haenx gak miz geijlai duz?”

“Aenneix……” Mozmoz gaeu- gaeu gyaeuj, mbouj rox baenzlawz suenq.

Diemjdiemj siengjsiengj le naeuz: “Gou rox lo, duzmoed dwg 30 duz, duzrwi dwg 18 duz.”

Diemjdiemj veh dozsienq okdaeuj, daekeiq dwk naeuz: “Duzmoed beij duzrwi lai 12 duz (lumj doz 1), duzmoed caeuq duzrwi gak gemj bae 6 duz le, duzmoed lij beij duzrwi lai 12 duz (lumj doz 2). Seizde, soq duzmoed dwg duzrwi 2 boix. Ndaej suenq ok duzrwi gemj bae 6 duz le dwg 12 duz. Ndigah, duzrwi dwg 18 duz, duzmoed dwg 18+12=30 (duz).”

“Caen coengmingz!” Boh’au duz- moed angq dwk naeuz: “Bouxlienzloz neix couh hawj mwngz daeuj dang ba.”

Diemjdiemj yawjraen Mozmoz mbwnj aenbak ndwn youq gizde, couh doiq boh’au duzmoed naeuz: “Gou siengj hawj Mozmoz buenx gou bae, ndaej lwi?”

“Ndei ha, yienghneix sou couh doxcaez bae ba! Geiq ndaej, gienh saeh neix itdingh banh ndaej ndei bw.” Boh’au duzmoed naeuz.

“Baujcingq banh ndaej ndei.” Diemjciemj caeuq Mozmoz angq dwk naeuz.

(Cwng Siujfungh)