Daxbuz gou roekcib lai bi, dwg boux bouxlaux lajmbanj bingzciengz he. Mboujgvaq mwngz gaej yawjsiuj daxbuz, de dwg lwgbawx hauqswnh gaenhlaenz mbanj gig okmingz he bw.

Daxbuz doiq buzgeq gou gig gvensim. Moix baez buzgeq daeuj ranz gou youq, daxbuz cungj dwg bang de ndawndaw rogrog swiq ndaej seuqsatsat, hawj de vuenh hwnj buhvaq daenj ndaej cwxcaih haenx. Daxbuz lij cawj gij haeux- byaek hab buzgeq gwn haenx. Moix baez yawjraen gij haeuxbyaek cawj hawj buzgeq haenx, gou cungj ngah ndaej myaiz rihragrag, cungj siengj caeg gwn geij gaemz. Moix haemh, daxbuz cungj caeuq buzgeq doxcaez ninz. Buzgeq nienzgeij laux lo, ninz mbouj ndaek, cungj gangjvah mbouj dingz, daxbuz couh buenx buzgeq gangjvah. Ndigah daxbuz cungj mbouj ndaej ninz ndei saek hwnz. Bouxwnq lawh de saek haemh, de cungj mbouj hawj.

Miz baez ndeu, buzgeq okhaex youq dangzvaq, neix dwg daxbuz ngamq bang de vuenh gvaq ne, gou guj daxbuz haengjdingh fat- heiq lo, hoeng mbouj siengj daengz, daxbuz mboujdan mbouj fatheiq, lij naihsim bang buzgeq vuenhsaeg. Gij heiqhaeu haeu raixcaix, gou nyouq daengz cungj siengj rueg, daxbuz cix lumj mbouj nyouq daengz heiqhaeu, lij mbouj dingz nai buzgeq.

Daxbuz baenzneix sinhoj, cix mbouj ienq sinhoj gvaq, lij doiq gou naeuz: “Buzgeq mwngz mwh coz gwnhaemz daiq lai lo, mbouj yiengj gvaq gijmaz fuk. De vih aenranz raeuz guh haujlai, seizneix de geq lo, raeuz yaek lai hauqswnh de di.” Dingq daengz gij vah neix, ndawsim couh gag doiq daxbuz gingqcungh hwnjdaeuj.

Seizneix, daxbuz gaenq miz di hwetgungq lo, gou rox de dwg vih aen ranz gou naetnaiq lai. Gou vih gou miz daxbuz baenzneix gamj- daengz miznaj, de dwg buengj- yiengh gou hagsib.

(seiq nienzgaep Yangz Swjyi)