Cug diuz mengqriengmax iqetet ndeu, baihlaj meizda lumj mbawliux vanvan haenx maj miz fouq da hung sawrikrik ndeu, daegbied miz saenz, caiq dem hwnj aen bak rox gangj rox cej ndeu, couh dwg duhgou boux dwggyaez ——Ciz Yuiyingj.

Gou dwg dah niq cibfaen vued- bued haengj doengh ndeu, doengzseiz gou hix gig rox gangjriu, ciengzseiz daeuq dwk daihgya got dungx riuhaha. Miz baez ndeu, boux baengzyoux gou Cizciz roeb daengz gij saeh mbouj haisim, roengzdangz le naengh youq diegnaengh naj saepsaengsaeng. Gou laeglemx byaij daengz henz ndang de, niuj aenndaeng, hob aenbak, hag gij sing duzcwz geq doiq de naeuz:“Gou yaek gouzgouz dahsau swnh- sienh, hawj aen mandouz hau gou bienqbaenz aen hanbaujbauh mwngz ceiq gyaez gwn haenx soengq hawj mwngz.” “Ha ha ha!”De doq deng gou daeuq angq lo, gij nyapnyuk ndaw dungx cungj gveng daengz gwnz fwj bae lo. Baez daengz goqhozdung ndaw ban, gij cezmuz gou biujyienj haenx cungj dwg ndaej daengz gyoengq doengzhag bekfwngz gopgop gok lumj byajraez nei, caezgya cungj heuh gou “maksimhai”, ndaw hoz gou beij gwn diengzrwi lij diemz.

Gou lij gig gyaez doegsaw. Saw hawj gou youq ndaw haijyangz cihsiz bonghyouz, de soengq hawj gou sawcuenh doenghsim, gosei gyaeu- ndei, dungzva gamjdoengh vunz ……Miz baez ndeu, gou cingq yinxsisi doeg 《Siuj Yinghyungz Yij Laiz》，daxmeh heuh gou son daegnuengx veh veh, ndaw bak gou dapwngq, cix itmienh lij doegsaw, itmienh gaem bit youq gwnz “ceij” luenh veh, deq gou yawj saw sat, caiq yawjyawj gij veh gou, doeksaetyak, diuz buh moq daxmeh ngamq cawx haenx daz rim gij rizveh raemxmaeg.“Mwngz neix guh gijmaz? Gij uq neix gig hoj swiq seuq dah!”Daxmeh hemqyatyat. Gou mwh gip bienq gvai, ngeix hwnj gij banhfap ndaw bwzgoh cenzsuh: Youq gwnz rizveh raemxmaeg daz hwnj caengz ciujcingh ndeu, aeu biubwz- faenj raix roengz ndaw raemxcaep bae gyauxhoed, riengzlaeng caiq gya didi sijyihfaenj, cuengq gij buh daz ciujcingh haenx roengz ndaw raemx sijyihfaenj bae cimq yaep he. Daxmeh ciuq gij banhfap gou bae guh, dahraix, de loh ok aennaj riunyumnyum：“Lij dwg yaek lai doegsaw ho!”Gou angq- vauvau lumhlumh laenggyaeuj.

Neix couh dwg gwnz seiqgyaiq gagdog daegbied gou, mwngz nyienh- eiq caeuq gou guh baengzyoux lwi?

(bouxsij: Sam nienzgaep Ciz Yuiyingj Bouxhoiz: Goenggen)