Seizneix miz haujlai vunz cungj yungh veihsin, saimbwk lauxcoz lumjbaenz cungj liz mbouj ndaej de. Baengzyoux dox gangjgoj, caencik doxiek gwnhaeux, yungh veihsin gyaucienz cawx doxgaiq……，veihsin cingq gaijbienq gij gwndaenj vunzlai.

Dangyienz, mwh veihsin hawj daihgya daiq daeuj fuengbienh, doengzseiz hix daiq daeuj nyapnyuk. Daxboh dwg boux maez veihsin he, gingciengz dawz soujgih yawj gienbaengzyoux ndaw veihsin, cix lumzlawq gou caeuq daxmeh. Gou geijlai muengh daxboh cou ok di seizgan daeuj caeuq gou gangj vah ha! Doeklaeng daxboh hix gag genjdauj, roengz gietsim noix yawj veihsin, hoeng genhciz mbouj ndaej geijlai nanz, youh maez haeuj veihsin yut mbouj okdaeuj lo.

Gyoengqvunz yienghneix maez veihsin, veihsin caen dwg baenzneix ndei ha? Gou gig geizheih, couh yungh aen soujgih daxboh sinhcingj aen hauh veihsin he, daeuj daejniemh mbat he. Ha, caen dwg daiq mizyinx lo! Veihsin naengz caeuq baengz- youx gangjgoj, faenyiengj siengqbenq, lij naengz ciengj hoengzbau, caen gvaqyinx ha! Doeklaeng gou sawqmwh roxnyinh, veihsin couh lumj duz fangzgvaiq he, cingq laeglemx sai gij seizgan gou, sai gij cingsaenz gou. Moix baez yawj veihsin le, gou roxnyinh gyaeuj dot uk ngunh, cungj mbouj miz sim yawj saw hagsib lo.

Veihsin ha veihsin, gou doiq mwngz caen dwg youh gyaez youh haemz ha!

(seiq nienzgaep Vangz Swjcunz)