Dou lwgnyez lajmbanj seiz- gan rogdangz, mbouj dwg yawj densi couh dwg loengh dennauj soujgih, gig noix miz vunz doeg sawgovai.

Gou yienznaeuz hix youq lajmbanj doegsaw, hoeng daxboh daxmeh dwg sonsaw. Aiq dwg deng bohmeh yingjyangj, gou hix gyaez yawj saw. Gij saw ndaw ranz hab gou doeg haenx mbouj suenq lai, miz bak lai cek. Youq ndaw doengzdoih nienzgeij dox- doengz haenx, gou suenq ndaej hwnj doeg saw lai lo. Moix baez hwnj dangz cozvwnz, lauxsae cungj dwg aeu cozvwnz gou guh fanvwnz doeg hawj daihgya, gyoengq doengzhag gig hozhaenz gou.

Miz baez ndeu, boux doengzhag cuj gou cam gou: “Cujcangj, cozvwnz mwngz vih maz sij ndaej baenz ndei ha?” Gou doiq gyoengqde gangj: “Sou siengj sij ndei cozvwnz, couh yaek lai yawj sawgovai.” Gou lij caeuq gyoengqde iekdingh, gou moix couh daj ndaw ranz daiq hawj gyoengqde moix vunz bonj sawgovai he, caj gyoengqde dawz geij bonj saw neix yawj sat le, gou caiq vuenh lingh gij saw hawj gyoengqde. Siengj mbouj daengz, doengzhag ndaw cuj gou daj seizde hwnj gyaez hwnj yawj saw lo, cawzle gij saw gou daiq hawj gyoengqde, gyoengqde lij gag bae cawx, yienghneix cuj dou couh gingciengz miz sawgovai yawj mbouj liux lo.

Doeklaeng gou siengj, danghnaeuz ndaw ban laeb aen goksaw he, gyoengq doengzhag mbouj couh miz sawgovai yawj luma? Gou aeu aen siengjfap neix lwnh hawj banhcujyin le, goksaw ndaw ban gig vaiq couh guh baenz lo. Gyoengq doengzhag aeu gij sawgovai swhgeij cuengq haeuj goksaw bae, couh ndaej doxvuenh yawj lo.

Gou baenz bouxguenjsaw ndaw ban. Moix ngoenz cungj miz doengzhag daeuj caeuq gou ciq saw、boiz saw, yienznaeuz gig sinhoj, hoeng ndawsim gou gig angq. Mwh roengzdangz, caiq hix yawj mbouj raen gij cingzgingj doxdwk doxnauh lo. Gyoengq doengzhag ndaw fwngz gaem bonjsaw, yawj ndaej gig haeuj- maez, miz mbangj doengzhag lij daiq ma ranz yawj dem. Caenh- guenj lij miz boux baj doengzhag mbouj siengj yawj saw, hoeng yawjraen gyoengq doengzhag cungj dinghdingh yawj saw, gyoengqde hix mbouj eiqseiq cauz bouxwnq, miz seiz hix gaem saw daeuj yawjyawj.

Faenyiengj, daiq hawj gou angqyangz caeuq miznaj, hix daiq hawj gyoengq doengzhag engq lai cihsiz.

(haj nienzgaep Vangz Gvanboz)