Goxgonq, youq aen mbanj Ngoz- lozswh he, miz boux canghsoujgoeng he, de guh gij lwgvunznamh gig ndeiyawj. Caj lwg de majhung le, bohlwg couh caez guh lwgvunznamh.

Dinfwngz daeglwg beij daxboh lij lingzgiuj, gyahwnj bouxcoz rengz hung, guhhong youh vaiq youh ndei, dinfwngz gig vaiq couh ganj hwnj daxboh lo. Gij lwgvunznamh daxboh guh haenx gai 2 luzbu, daeglwg guh haenx couh gai ndaej 3 luzbu. Hoeng daxboh lij dwg doiq gij lwgvunznamh daeglwg guh haenx mbouj habhoz, cungj dwg gangj gij mbouj ndei de. Yienghneix, daeglwg guh engq ciensim, engq roengzrengz lo.

Doeklaeng, gij lwgvunznamh daeglwg guh ndaej yied daeuj yied ndei, gyaqcienz gaenq hwnjgyaq daengz 10 luzbu. Hoeng daxboh lij dwg mbouj habhoz, mbouj dingz vix giz mbouj ndei okdaeuj: Aen da neix beij lingh aen da hung lo, aenmbaq mbouj doxdaengh, ribfwngz daiq iq yawj mbouj raen……

Miz ngoenz ndeu, daeglwg hoz- ndat lo, naeuz: “Boh, mwngz vihmaz cungj naeuz gou guh gij lwgvunznamh neix mbouj ndei? Lwgvunznamh mwngz guh haenx gou cungj vix ndaej ok 20 giz mbouj ndei ne! Mwngz hix mbouj yawjyawj, lwgvunznamh mwngz guh haenx cij gai ndaej aen 2 luzbu, hoeng gou gai 10 luzbu gyoengqvunz lij ceng dwk cawx. Gou roxnyinh lwgvunznamh gou guh haenx mbouj miz saek giz mbouj ndei, gaenbonj mbouj yungh caiq gaij lo.!”

Daxboh gig siengsim, naeuz: “Lwg ha, mwngz gangj haenx gou cungj rox, mboujgvaq gij vah neix daj ndaw bak mwngz gangj okdaeuj, gou gig nanzgvaq. Ai, baezlaeng mwngz guh lwgvunznamh caiq hix mbouj mauhgvaq 10 luzbu lo.”

“Vih gijmaz?” Daeglwg doeksaet dwk cam.

Daxboh naeuz: “Boux canghsouj- goeng he, danghnaeuz nyinhnaeuz dinfwngz swhgeij gaenq gig ndei lo, neix couh gangj de mbouj caiq cinbu lo. Neix couh dwg yienzaen gou guh gij lwgvunznamh haenx vih maz cij gai ndaej 2 luzbu ha!”

(daj hilez “guh engq ndei swhgeij” Denhdi Cuzbanj Se genj bien hoiz)