Max iq、maxloeg iq、douq iq cingq youq ndaw ndoengfaex guhcaemz. Seizde lingz iq caeuq mui iq byaij gvaqdaeuj.

“Lingz iq mui iq, sou bae gizlawz ha? Haxbaenh dou ra sou daeuj caeuq dou guhcaemz cungj ra mbouj raen.” Maxloeg iq naeuz.

“Dou bae bouqsaw lo, lij cawx ndaej geij bonj saw dem.” Mui iq naeuz.

“Gijmaz saw? Hawj gou yawjywj.” Maxloeg iq naeuz.

“Gou hix yawj!” “Gou hix yawj!”

“Gaej gaenj, gou ok diuz daez he, sou boux lawz dap doiq gonq couh hawj bouxde genj gonq.” Lingz iq naeuz.

“Yienghneix mwngz vaiq gangj!” Max iq naeuz.

“Gou cawx ndaej song bonj saw, mui iq cawx ndaej sam bonj saw, cienz saw dou dwg ityiengh. Gyaqcienz haj bonj saw baenbied dwg 3 maenz、5 maenz、9 maenz、11 maenz caeuq 12 maenz, gij saw dou cawx haenx gak dwg geijlai maenz?”

Maxloeg iq swnh bak naeuz:“Saw mwngz cawx haenx dwg 11 caeuq 12 maenz, saw mui iq dwg 3 maenz、5 maenz caeuq 9 maenz.”

Max iq naeuz:“Mbouj deng! Yiengh- neix boux ndeu yungh 23 maenz, lingh boux dwg 17 maenz, cienz song boux mbouj doxdoengz.”

Douq iq naeuz:“Gou rox baenzlawz suenq lo. Aenvih haj bonj saw cungjgungh dwg 3+5+9+11+12=40 (maenz), 40÷2=20 (maenz), lingz iq caeuq mui iq cungj dwg yungh 20 maenz……”

Siuj baengzyoux, mwngz rox dapanq dw gijmaz lwi?

(Duz Cauyoz)