Da hung, ndaeng mboep, bak iq……Neix couh dwg yienghsiengq gou, dingjlingz gij cih gou hix caeuq yienghsiengq gou ityiengh, “da” hung, “ndaeng” mboep, “bak” iq, aeu song aen cih gyonj hwnjdaeuj gangj, couh- dwg: Yakyawj.

Lajmbwn lauheiq gig nanz ra raen boux okseng couh ndaej sij ndei cih haenx. Cih ndei dwg baengh doeklaeng lienh okdaeuj, mbouj dwg seng couh daiq daeuj. Vwnzdiz gou lauheiq couh ok youq cih “lienh” gwnzde——lienh ndaej mbouj nyinh- caen.

Couh gangj baez singhgiz roek gonq sij cozyez gienh saeh neix ba. Lauxsae baeuqcaeq le haujlai cozyez, gou ma daengz ranz, gwn caeuz gvaq, swiqndang catheuj ndaej le, couh dajsuenq sij cozyez lo.

Seizneix cingqngamj daxmeh youq gizhaenx yawj densi. Gwnzde cingq cuengq《Sae Youz Geiq》，neix dwg bouh heiq gou muenghdeq hauj- lai nanz haenx. Aensim gou sikhaek couh deng Sunh Vugungh boux baez dingjbyonj couh buet ndaej cib fanh bet cien leix haenx “gaem”bae lo.

Gou doq yawj densi doq sij cozyez. 《Sae Youz Geiq》boq liux, cozyez gou hix sij liux lo. Sij ndaej baenzlawz, mwngz naemj hix rox lo.

Ngoenz daihngeih, gou gyau cozyez hawj lauxsae. Lauxsae gaij sat, couh goengbouh ok mingzdan gyoengq boux cih sij ndaej lujlaj、lauxcauj、yakyawj, aeu dauqcungz sij gvaq haenx.

Daih’it boux couh dwg gou! Seizhaenx gyaeuj gou “maenj” le yaep ndeu. Moengzloengz ndawde, mbouj rox byawz gangj le coenz ndeu:“Cih Yez Leij sij mbouj ndei lo!”

Gou mbouj rox geij nanzgvaq. Gou caen siengj dawz haemhlwenz swhgeij doq yawj densi doq sij cozyez gienh saeh neix lwnh hawj lauxsae nyi ha, hoeng gou dauqdaej mbouj gamj gangj ok bak.

“Loek gvaq baez ndeu, lai gvai di ndeu”. Baez ginglig neix hawj gou rox hit: Mboujlwnh guh gijmaz saeh cungj aeu ciensim, mbouj ndaej lwgda yawj aen neix, ndaw fwngz cix guh aen haenx.

Dangyienz, yienznaeuz seizneix cih gou sij ndaej mbouj suenq ndei, hoeng ceiqnoix dwg caezcingj seuqsak lo, mbouj caiq dwg luenhlablab lo, hix mbouj caiq hawj vunz yawj le gyaeuj- dot lo! Neix dwg doenggvaq gaenx lienh cij ndaej daeuj. Gou dwg mbouj dwg Lauxvuengz gai gva——gag gai gag haenh ha? Mbouj, neix dwg saedsaeh. Gou saenq, cijaeu laebdaeb nyinhcaen lienh, cih gou itdingh sij ndaej yied daeuj yied ndei!——Hoeng, yienghsiengq gou naengz mbouj naengz hix bienq ndaej ndei di ne?

(bouxsij: Yez Leij bouxhoiz: Ouh Caijfangh)