Ndaw sim giz laeg gak vunz, cungj yo miz di baexmaed, gou hix dwg yienghneix. Aen baexmaed iq gou caeuq aen“haedfwngz cuenqsig”mizgven.

Bi’gvaq seizcin ngoenz singhgiz ndeu, daengx ranz gou bae camgya le ciengz vaenleix ndeu. Mwh lwggwizmoq hawj bawxmoq dawz hwnj haedfwngz cuenqsig, daxmeh doiq daxboh naeuz：“Yawj vunz dawz haedfwngz, geij vuenyungz ha!” Daxmeh coenz vah neix, gou laeglemx geiq haeuj ndaw sim bae lo. Youq neix gaxgonq, daxmeh hawj gou bauq le banganghginz, Guj lauxsae son ganghginz haenx vih hawj dou ndaej laebdaeb nyinhcaen hag ganghginz, moix baez hwnjdangz seiz, danghnaeuz byawz biujyienh ndei couh ciengj hawj de duj vahoengz iq ndeu, gij vahoengz iq neix rom daengz itdingh soqliengh, couh ndaej vuenh baenz gij doxgaiq swhgeij maijgyaez haenx. Gou roengzrengz le geij ndwen, dauqdaej yungh gij vahoengz iq rom ndaej neix, vuenh aeu le aen “haedfwngz cuenqsig” bonjfaenh muenghdeq gig nanz haenx daeuj. Ngoenzseng daxmeh ngoenzhaenx, ranz ngamq rongh gou couh benz hwnjdaeuj, siujsim yupyup dawz aen“haedfwngz cuenqsig” cuengq haeuj aen hab iq gyaeundei bae. Caj daengz daxmeh hwnq mbonq, gou gipmuengz dawz faenh saenzcingz neix soengq daengz naj de bae, yienzhaeuh gangj：“Meh, ngoenzseng angqyangz!”

(Couh Swjhwngz sij Ouh Caijfangh hoiz)