Miz baez he, lauxsae buci cozyez mbouj suenq lai. Cuengqhag ma daengz ranz, gou dawz bonjcozyez okdaeuj yaek sij, bingzseiz cij yungh buenq diemj cung roxnaeuz diemj cung he couh sij sat lo, hoeng baezneix gou itmienh guhcaemz itmienh sij, itcig sij daengz gouj diemj buenq, lij miz sam yiengh cozyez caengz ndaej sij. Mwhde, duznon raninz raih hwnjdaeuj lo, gou gamjdaengz gig naet, caenhguenj gou doengh aenndang siengj gyaep duznon raninz bae, hoeng gou lij dwg gig siengj ninz. Yienghneix gou couh hwnj mbonq bae yietnaiq yaep ndeu, mbouj rox seiz lawz, gou couh ninzndaek lo, cigdaengz ndiu daeuj cij fatyienh cozyez caengz sij sat, gou ganjgip roengz mbonq sij cozyez. Daxmeh deng gij sing gou cauz ndiu lo, de byaij daengz henz ndang gou, gig yiemz doiq gou naeuz: “Itmienh guhcaemz itmienh sij cozyez cij sij mbouj liux, danghnaeuz mwngz haetcog caet diemj cung cij ndiu, mwngz couh mbouj miz seizgan bouj sij cozyez lo, mwngz yaek roxriuj, seizgan ceiq dijbauj, hix ceiq yungzheih saet bae. Baezlaeng mwngz aeu hag rox gaemndaet de.” Dingq vah daxmeh le, gou mbouj eiqseiq ngaem gyaeuj roengzdaeuj lo.

Ngoenz daihngeih cuengqhag le, cozyez beij gaxgonq lai di, hoeng gou cagaenj seizgan nyinhcaen sij, cij yungh diemj cung he couh sij sat lo. Cozyez sij sat le, gou hix roxnyinh daengx ndang soengswt lo.

Dwg ha! Seizgan couh lumj fagnaq liz gung haenx, baez nyingz bae couh mbouj dauqma lo, hawj raeuz daj iq couh hag rox insik seizgan ba!

(seiq nienzgaep Cangh Sinh)