Youq dieg lueg doekgumx he, miz duz roegdinghgeng geq ndeu, de ok gyaeq ok haeuj ndaw rongz duzromh bae.

Mwh aen’gyaeq ngamq dotbyak, lwg roegdinghgeng neix caeuq lwg duzromh maj ndaej doxlumj lili, hoeng ndaw hoz de gag rox, de dwg roeg- dinghgeng, cix mbouj dwg duzromh.

Ndaw simdaej de miz aen niemh- daeuz he: Caenh miz aen banhfap ndeu ndaej cingqmingz gou dwg roegdinghgeng, couh dwg ciengq hot go ndei dingq he, hawj gyoengqde rox daengz gou dwg duz roegdinghgeng rox ciengq go ndeu, dwg boux cangh- ciengqgo ndeu.

Miz aen niemhdaeuz neix le, roegdinghgeng roengzrengz raixcaix, vih siengjmuengh bae haenqrengz guh.

Ngoenz ciemh ngoenz, roeg- dinghgeng liz guhbaenz yied daeuj yied gyawj lo.

Roegdinghgeng haisim dangq- maz, hoeng duzromh di cungj yawj mbouj hwnj de, gyoengqde youq raeblaeng riugae roegdinghgeng: “Ndaek neix mingzmingz dwg duz- romh, nyengh naeuz swhgeij dwg roegdinghgeng, lij caen nyinhnaeuz swhgeij dwg duz roegdinghgeng ndeu, gou yawj, de ciengq gij sing haenx coengzlaiz mbouj dwg singgo, cix dwg ‘duzromh coemj gaeqlwg’ baz! hahaha!”

Moix baez youq dangqnaj vunz- lai, gyoengqde cungj riugae roeg- dinghgeng:“Gaej guh fangzhwnzloq lo, couh suenq mwngz caen dwg roegdinghgeng, caen rox ciengq go, hoeng youq ndaw rog ndoi bya fwz neix, gij go mwngz youh miz byawz daeuj dingq ni?”

Saekbaez, roeg iq mbin gvaq loh, gyoengqde hix gienq roegdinghgeng: “Mwngz youq gizneix ciengq go caiq ndei dingq, hix mbouj miz vunz daeuj dingq. Gou yawj mwngz gaej yungh ciengq go lo!”

Roegdinghgeng dauq buek naeuz:“Gou yaek ciengq go, dwg aenvih gou gyaezmaij; gou yaek ciengq go, dwg aenvih gou yaekaeu singgo daeuj cingqmingz gou dwg roeg- dinghgeng.”

Yienznaeuz duzromh caeuq roeg iq yawjcuij de, hoeng roegdinghgeng lij dwg roengzrengz cuengq sing ciengq go.

Gvaq geijcib bi le, gizneix roeg heuhceuceu, va homfwdfwd, gij roeg- dinghgeng rox ciengq go haenx ciengxlwenx cungj mbouj lumz duz roegdinghgeng daih’it son gyoengqde haenx, yaek cingqmingz swhgeij miz- youq, couh roengzrengz bae guh……Gyoengq hekyouz daeuj gizneix youz haenx, cungj ndaej dingq nyi gij singgo goksadsad haenx, ndigah, gyoengqvunz haenh gizneix dwg “diegsaenz roegdinghgeng”.

(bouxsij Huz Gizcwnz boux- hoiz Goenggen)