Moix boux vunz cungj miz gij saeh swhgeij siengj guh haenx, lumj: Siengj hag ganghginz, siengj gwih danci, siengj hag diuqfoux, siengj hag ciengqgo, daengjdaengj. Mwngz rox gou siengj guh gijmaz lwi? Gou siengj fatmingz sam cungj haiz saenzgeiz.

Cungj haiz daih’it gou siengj fatmingz haenx dwg haizbyaijvaiq. Danghnaeuz mwngz siengj bae giz dieg he, hoeng seizgan gaenj, ndaej naenx aen anniuj saekgyaemq gwnz gouh haizbyaijvaiq, de couh daiq mwngz riengjret baedaengz giz mwngz siengj bae haenx.

Cungj haiz daihngeih gou siengj fatmingz haenx dwg haizraeujliengz. Seizdoengz, danghnaeuz mwngz roxnyinh din gig gyoet, ndaej naenx aen anniuj saeknding gwnz gouhhaiz, gig vaiq, din mwngz couh lumj youq ndaw denz haenx raeujrub lo. Seizhah, roxnyinh din miz di ndat, mwngz couh naenx aen anniuj saeklamz gwnz gouhhaiz, din mwngz couh sikhaek liengzsisi lo.

Cungj haiz daihsam gou siengj fatmingz haenx dwg haizciengqgo. Mwh mwngz siengj diuqfoux, naenx aen anniuj gwnz gouh haizciengqgo, de couh sikhaek boq gij go mwngz siengj dingq haenx. Doengzseiz de lij rox riengz singgo yubyab rongh gak saek daengrongh ne!

Baenzlawz yiengh? Sam cungj haiz neix gig saenzgeiz ba! Gou siengsaenq, cungj miz ngoenz he gou itdingh fatmingz ok gij haiz neix.

(seiq nienzgaep Cwnz Swjmoz)