Neix dwg naed ceh he, naed ceh bingzciengz he, ninz youq ndaw namh laeprau gyoetgyat.

De siengjmuengh ndawbiengz gwnz dieg, dingq duzmoed naeuz, gwnz dieg cix mbouj lumj gyoengqde siengj haenx mbwqmbat. Gwnz dieg miz go’nywj heuyau, miz dujva nding- yan, miz raemxrij lamzcwng, lij miz ndit raeujrub. “Ndit dwg gijmaz?” Naedceh cam. “Ndit dwg gij doxgaiq gwnzbiengz ceiq ndei haenx.” Duz- moed dap naeuz.

Naedceh lijdwg mbouj rox gij vah duzmoed, aiqdwg gij vah neix daiq laeg lo, naedceh gig siengj caenda yawjyawj gij yienghceij ndit dwg baenzlawz.

Doeklaeng miz ngoenz he, naed- ceh ndonj ok najnamh, de caen yawj- raen go’nywj hauyau, dujva nding- yan, raemxrij lamzcwng lo, hoeng de baenzlawz hix yawj mbouj raen ndit.

De cam mbungqmbaj henz ndang:“Mwngz dwg ndit lwi? Gou yawjraen mwngz baenzneix gyaeu- ndei.”

Mbungqmbaj riu lo:“Docih mwngz haenh gou, mboujgvaq gou mbouj dwg ndit ne.” “Yienghneix ndit dwg gijmaz ne?” Naedceh cam. “Ndit couh dwg gij doxgaiq seizseiz cungj hawj mwngz raeujrub, de gizgiz cungj miz.”

Mbungqmbaj mbin bae lo, naedceh lijdwg buenq rox buenq mbouj, mboujgvaq de miz di rox lo.

Mwh de yungh rag angq dwk supgwn raemx seiz, de roxnyinh gig raeujrub. Mwh duzndwen bang de soeng namh, de roxnyinh gig raeujrub. Mwh rumz riunyumj ci coh de, de roxnyinh gig raeujrub.

Aeya, laxlawz lajbiengz miz baenzlai ndit ha!

Naedceh aeu gij ndit de gamj- souh daengz haenx cungj soucomz youq doxcaez, dawz ok gij mak vandiemz. Seizneix, de gaenq mbouj dwg naedceh lo, wnggai heuh de guh gofaex hung lo.

Duz roeg dwggyaez he gwn gij mak vandiemz de: “Gou cam mwngz, mwngz dwg ndit lwi?” Dingq daengz aen vwndiz neix, gofaex hung lumj daj gwnz ndang duzroeg yawjraen doenghbaez swhgeij nei.

Baezneix, de caencingq rox gij hamzeiq ndit lo.

Laxlawz, moix boux vunz cungj ndaej baenz ndit. Caiq gangj, mwh mwngz soucomz gij ndit bouxwnq hawj mwngz, mwngz doengzseiz hix aeu ndit hawj bouxwnq, mwngz soucomz gij ndit haenx, dwg gij ringiek bang mwngz guh ndaej baenz. Ndit gizgiz cungj miz. （Yinghswj）