Miz ngoenz ndeu, hwnj dangz suyoz, dou hag le aen vwndiz “gaeq douq doengz roengq”.

Ndaw roengq miz lai duz gaeq caeuq douq. Daj baihgwnz geq, miz 35 aen gyaeuj, daj baihlaj geq, miz 94 gaiq ga. Gaeq caeuq douq gak miz geijlai duz?

Lauxsae gangj cungj suenqfap mizyinx he hawj dou.

Lauxsae naeuz: “Gyajsiet aenroengq baih- rog sawqmwh miz bauqrengh yiengj, duzdouq doeksaet dwk cungj ndwn hwnjdaeuj, aeu 2 gaiq ga baihnaj goemq aen rwz. Mwhhaenx, duzdouq caeuq duzgaeq doengzyiengh dwg 2 gaiq ga ndwn youq gwnz dieg lo. Yienghneix, gij ga gaeq caeuq ga douq ndwn youq gwnz dieg haenx miz geijlai gaiq ne?”

“2×35=70 (gaiq).” Gyoengq doengzhag daekeiq vauvau naeuz.

Lauxsae ciepdwk cam:“Gij ga gyoengq douq goemq aenrwz haenx miz geijlai gaiq ne?”

“94-70=24 (gaiq). Neix daiq genjdanh lo!”

“Moix duz douq yaengx hwnj 2 gaiq ga, gyoengq douq itgungh yaengx hwnj 24 gaiq ga, yienghneix itgungh miz geijlai duz douq?”

“Neix couh engq genjdanh lo.” Gyoengq doengzhag ndaengmoj lo.

“24÷2=12 (gaiq）, miz 12 duz douq. Gaeq miz 35-12=23(duz).”

Cungj suenqfap neix dwg mbouj dwg gig mizyinx、gig yungzheih lijgaij? Mwngz hag rox caengz? (Cenz Ginhleiz)