Ranz gou couh lumj aen dungvuzyenz mizyinx ndeu, mbouj saenq? Mwngz daeuj yawjyawj ba!

Daegnuengx lumj duz “nou iq”, cungj maij caeg gwn doxgaiq, cijaeu mbouj louzsim, gijgwn daxmeh ngamq cawx daeuj cuengq youq gyang doengjdaiz haenx couh mbouj raen lo. Danghnaeuz mwngz fatyienh de cingq caeg gwn, hw, de couh sikhaek din caij naeng sae’gva——deuz bae vaiqdangq lo.

Gou caeuq dahnuengx dwg song duz “lingz manz”, baenzngoenz cungj youq sahfaz diuq hwnj diuq roengz, youq ranzrug ndonj bae ndonj dauq, mbouj dingh saek yaep. Daegbied dwg daxmeh daiq dou bae lijyouz seiz, gou caeuq dahnuengx engq dwg nauh lai lo, yaep ndeu youq henz ndang daxmeh, yaep ndeu youh caenx haeuj ndaw vunz lai nauhyied bae, cungj dwg nauh ndaej bohmeh simnaet liux, lau mbouj siujsim dou couh ngaiz loengdeuz bae.

Daxmeh dwg duz “saeceij ak”, moix baez gou caeuq dahnuengx guhcaemz ndaej angqbuepbuep seiz, cungj naengz dingqnyi daxmeh “maenjhumhum”, “Vei, sou dingqnyi caengz? Lij nauh ha? Byawz heuh sou nauh ndaej ndaw ranz yienghneix luenh ha?”Yied raen daxmeh fatheiq, dou yied haisim, laebdaeb youq gwnz sahfaz diuqdatdat. Singhoz daxmeh youh daezsang bet doh lobw：“Lij diuq ha? Gij buhvaq cungj deng sou caij uq liux lo! Sou vaiq di roengzdaeuj!”Cigdaengz daxmeh yunghrengz rag dou roengzdaeuj, ndaq geij coenz, caiq doiq caekhaex “haenq rengz” moeb donq ndeu, bik mbouj ndaej “vilig saeceij” de, dou cijndaej ngaem gyaeuj nyinhloek, dangyienz, baez- laeng youh ciuqyiengh caiq famh.

Daxboh dwg duz “cwz geq”, cungj dwg mbouj lau dwgrengz mbouj lau vunz ienq gaenx guhhong, ciuqgoq vunz ndawranz. Moix haet cungj ciuq- seiz soengq dou baehag, banringzgvaq bae ciep dou cuengqhag, banhaemh lij buenx dou sij cozyez, son dou hagsib. De cungj dwg yienghyiengh ciuqgoq daengz dwk gvansim caeuq ndiep- gyaez dou.

Yawj, neix couh dwg ranz gou, aen dungvuzyenz angq ndeu, “gak cungj doenghduz” doxhuz doxgyaez doengzcaemh gvaq saedceij, moix ngoenz cungj dwg yienghhaenx vandiemz vuenyungz.

(Linz Suhyiz sij Ouh Caijfangh hoiz)