Dingqnyi sing yaekseiz hai dou, gou sikhaek ndoj haeuj raeb dou bae, caj daxboh haeuj ranz. Yaepyet, aenndang youh sang youh hung gou gig sug haenx okyienh lo. Gou sikhaek hwnjbae got dawz aenhoz daxboh, aenndang lumj diuzgaeu nei heux dwk daxboh, angqcoux daxboh okcai dauqma. Byawz rox, daxboh cix naeuz: “Vaiq roengzdaeuj, boux lwgsai he baenzlawz baenzneix nem vunz, lumj lwgmbwk nei.” Gij yiedcingz gou sikhaek mbouj miz lo.

“Daeglwg geij ngoenz mbouj raen mwngz lo, baenzneix siengj mwngz, mwngz couh mbouj ndaej doiq de unqswnh di ha?” Daxmeh yawj mbouj roengzbae lo, vih gou gangjvah. Daxboh mbouj eiqseiq naeuz: “Dwg mbouj dwg ha, lwg gvai? Cungj ienq daxboh, daiq mbouj rox gangjriu lo, hw hw hw……” Daxboh lumj boux lwgnyez guh saeh loek nei, menhmenh byaij daengz baihnaj gou, gungj ndang roengzdaeuj doiq gou naeuz：“Daeuj ba, daxboh caeuq mwngz guh gij laex raennaj bouxsai!” Gangj dwk, de iet song gen daeuj coux gou. Gou got dawz daxboh, daxboh gingqyienz got dawz gou baenqcienq!

(ngeih nienzgaep Cangh Cujcunz)