Ranzmbanj gou youq aen cin iq seiqhenz cungj dwg bya he. Gizhaenx seiqgeiq lumj fukveh nei, cij aeu miz vunz daeuj gizneix youz, cungj haenh de gyaeu, caemhcaiq mbouj siengj dauqma dem!

Ndaw cin cij miz geij bak boux vunz, hoeng ciuqyiengh nauhyied raixcaix, aenvih ndaw cin cungqgyang miz aen mboq- byaleix he.

Raemx mboqbyaleix saw- dikdik, seizseiz cungj yawjraen byaleix youq ndaw raemx guh- angq. Ceiq mizyinx haenx dwg, gyoengqvunz gaenq caeuq byaleix baenz baengzyoux ndei lo. Daihgya ndaej itmienh swiq byaek itmienh yawj byaleix yat hwnj yat roengz, gyoengq byaleix ciengz yat haeuj ndaw swxbyaek bae, caeg geij mbaw byaek le caiq youz bae; lwgnyez ceiq gyaez caeuq byaleix guhcaemz, cijaeu miz seizgan, gyoengqde couh daiq di mbawbyaek he, vut roengz raemx bae, gyoengq bya couh sikhaek youz gvaqdaeuj; lij miz mbangj lwgnyez diuq roengz raemx bae, caeuq byaleix hag youzraemx ne! Saedcaih dwg cijaeu iet fwngz couh ndaej deb byaek he, hoeng yawjraen byaleix baenzneix dwggyaez, byawz youh siengj bae gwn de ne?

Henz mboqbyaleix miz geij go faexraeu. Seizcin, mbawraeu youq ndaw rumzcin cifengfeng did ok nyod daeuj, oiqetet, heuwtwt; seizhah, mbawfaex heuyauyau haenx youq ndaw rumz bifangfang, fat ok gij sing yiengjsasa, lumj cingq danz diuz go daswyenz nei; seizcou, rumz liengzsangj ci nding mbawraeu lo, mbawraeu nding lumj feiz, nding lumj daengloengz, nding lumj mbawgeiz guekcoj raeuz; seizdoeng, baenz caengz baenz caengz siethau at dwk nyefaex vangoz lo, mbawfaex mbinyagyag loenq roengzdaeuj, loenq daengz gwnz dieg dangguh fandenz, bang goraeu dohgvaq seizdoeng. Aenmboq yienghneix ingj dwk gofaex yienghneix, caen dwg: “Vunz youq ndaw cin byaij, lumj byaij ndaw veh youz.”

(seiq nienzgaep Cangh Sunyauz)