Nyaengq baenz haet lo, gwn haeuxngaiz le, gou ninz youq gwnz mbonq, caeuq daxbuz gangjgoj.

“Daxbuz, mwngz bineix ndaej geijlai bi ha, mwngz dwg bi lawz seng?”

Daxbuz riunyumnyum naeuz:“Baenz- lawz sawqmwh cam gijneix ha? Gou bineix 66 bi lo.”

“Mwngz dwg bi lawz seng?” Gou ciepdwk cam.

Gwnz naj daxbuz loh ok gij yiengh lumj cingq naemj nei: “Aenneix ma, 50 nienz? Mbouj deng…… 49, wnggai dwg 49 nienz seng.”

Gou gig ngeizvaeg, 66 bi, baenzlawz dwg 49 nienz?

Daxbuz youh siengj yaep ndeu, bwnda baez hai, naeuz: “Dwg 51 nienz seng, deng lo, 49 nienz dwg bi daxgoeng mwngz seng!” “Yienghneix cij deng, daxbuz, geiqsingq mwngz baenzlawz baenzneix ca ha?” Gou riu dwk naeuz.

“Geq lo, geq lo, ngoenzseng swhgeij cungj geiq mbouj ndaej lo……mboujgvaq gou geiq ndaej bw, mwngz dwg 05 nienz 1 nyied 2 hauh seng, liggaeuq dwg ndwen 11 ngoenz 22, bi haenx doek geij ciengz siet hung ne……”

Daxbuz gangj mbouj dingz dwk dauqngeix gij saeh bi gou seng haenx, lwgda ronghlik cingsaenz dangqmaz, aennaj angqvauvau. “Ngoenzseng boh mwngz dwg 1 nyied 27 hauh, goeng mwngz ha, ngoenzcog dwg ngoenzseng de…… gaej lumz hoh de ngoenzseng vaiqvued bw.”

Dingq daengz neix, gou gig doeksaet: “Daxbuz lienz swhgeij bi lawz ndwen lawz ngoenz lawz seng cungj geij mbouj ndaej lo, baenzlawz youh geiq ndaej cingcuj ngoenzseng gyoengqdou ne?” Gou yawj daxbuz, daxbuz cingq daekeiq riu dwk.

(seiq nienzgaep Cwnz Yihnoz)