Youq ndaw goqdangz, duzyiengz lauxsae naeuz: “Youq ndaw luegbya miz cungj raet saenzgeiz he, cungj raet neix mboujdan miz fapswd saenzgeiz, vanzlij gig ndei gwn dem. Cungj raet saenzgeiz neix miz cungj goengnaengz daegbied he: Lwg- nyez lauxsaed gwn de, couh bienq ndaej yied daeuj yied coengmingz, boux lwgnyez yaeuh vunz, gwn le couh bienq ndaej yied daeuj yied huk.”

Miz ngoenz ndeu gyanghaet, lwgmou、lwgmui caeuq lwgdouq youq ndaw ndoengfaex laj gocoengz he raen cungj raet neix, yienghneix daihgya cungj diemz- subsub gwn lo, lwgnyaenma ndwn youq henz haenx miz di lau, mbouj gamj gwn, yawj gyoengq baengzyoux cungj gwn, de myaiz cungj rih lo. Lwgmui itcig heuh de:“Lwgnyaenma, vaiq daeuj cimzcimz ha, ndei gwn lai lo!” Lwgnyaenma dingj mbouj ndaej lo, hix aeu aen raet he cuengq haeuj bak bae gwn lo. Aeya, mbouj ndei lo, lwgnyaenma raen swhgeij lumjbaenz bienq huk lo, byaij loh cungj byaij mbouj ndei. De siengsim dwk daejnga’nga. Duzyiengz lauxsae raen le naeuz:“Lwgnyaenma, mwngz mboengq- neix dwg mbouj dwg gangjyaeuh luha?” Lwgnyaenma ngaem gyaeuj roengzdaeuj mbouj eiq- seiq naeuz: “Gou caeg gwn byaek ranz boh’au max, lij yaeuh de dwg daegnuengx gou gwn.” Duzyiengz lauxsae yaengyaeng lumh aen’gyaeuj lwgnyaenma naeuz:“Rox swhgeij loek lo youh gibseiz gaij ndei couh dwg lwgnyez ndei. Mwngz itdingh dauq bienq baenz lwgnyaenma coengmingz.” Dahraix, vah ngamq gangj sat, lwgnyaenma couh bienq dauqma lo, din fwngz hix lingzled lo. Gyoengqdoih cungj angq dwk bekfwngz lo.

Daj mwhhaenx hwnj, lwg- nyaenma caiq mbouj yaeuh gvaq vunz lo. De baenz boux lwgnyez ndei lauxsaed he.

(sam nienzgaep Loz Cinghyauj)