Daxbuz gou gaenq caetcib caet bi lo. Caenhguenj ndwenngoenz mbouj louzcingz youq gwnz najbyak caeuq gokda de gaek roengz nyaeuq laeglwd, hoeng daxbuz gou lij gig cingsaenz.

Gou dwg lan ceiq iq daxbuz. Aenvih daxboh daxmeh guhhong nyaengq lai, mwh gou caengz hwnj hag gaxgonq, gou itcig caeuq daxbuz doxcaez gwndaenj. Daxbuz ceiq gyaez gou, mwh de yawj gou, bwnda、lwgda、gokbak cungj dwg vangungj……

Daxbuz daegbied cungh gou. Ranz daxbuz miz aen gulij hung miz fa he, baihndaw coux miz bingj dangz daengj gak cungj saejdaeuz. Daxbuz swhgeij mboujdan mbouj gwn, lij lumj lau bouxwnq raen nei, goemq ndaet fagu, cienzbouh louz hawj gou gwn.

Duenh seizgan caeuq daxbuz gwndaenj haenx, vihliux hawj gou gwn ndei, daxbuz cungj mbouj lau dwgrengz cawj gak cungj haeuxbyaek hawj gou gwn, miz seiz ngoenz ndeu cawj haj roek baez. Geiq ndaej miz baez ndeu, daxbuz gaenq cawj haeux ndei lo, hoeng dingqnyi gou naeuz siengj gwn mienh, couh cuengq vanjhaeux roengz, bae cawj mienh hawj gou gwn.

Neix couh dwg daxbuz gyaez gou haenx, gou caensim maqmuengh de ndangcangq gyaeunanz, ciengxlwenx buenx gou.

(seiq nienzgaep Ciz Hungzsui)