Gou dwg boux vunz launyaenq he. Youq ndaw hagdangz, gou cungj dwg boux dog gag dinghdingh naengh youq gungxgok. Yawj gyoengq doengzhag youq henz guhcaemz, gou gig siengj caeuq gyoengqde guhcaemz. Hoeng, gou lau- nyaenq, mbouj gamj ok sing, mbouj gamj caeuq gyoengqde gangj vah.

Miz ngoenz ndeu, daxmeh doiq gou naeuz: “Siu ha, mwngz yaek miz boux baengzyoux he cij ndaej.” Gvaq geij ngoenz le, daxmeh daj baihrog daiq ma aen gyaqsaw he. Laeblaeb daebdaeb, gwnz gyaqsaw miz le haujlai saw ndei yawj. Gou ciengzciengz youq baihnaj gyaqsaw moenghmangh. 《Lwg- duh Henz Cueng》、《Aenmuengx Hahloz》…… baenz bonj baenz bonj saw raeujrub baij youq baihnaj gou, yungz haeuj ndawsim gou. Sawqmwh, gou roxnyinh lumj miz geu ndit he ciuq youq ndawsim gou, sawj gou ronghsag, sawj gou sim- hai…… gou rox lo, gou yaek bae umjdawz cingzngeih cij ndaej.

Miz ngoenz he, gou sing iq laulili doiq boux doengzhag he naeuz:“Du Veicinh, mwngz singhgizroek miz seizgan lwi?”

“Miz ha!”

“Yienghneix mwngz bae ranz gou guhcaemz ba!” Gou angq dwk naeuz.

“Ndei ha!” Du Veicinh hix angq dwk naeuz.

Daj ngoenz haenx hwnj, gou hainduj cawjdoengh caeuq vunz gangj vah caeuq vunz guhcaemz lo. Gou rox, cijaeu swhgeij hailangh、gag miz saenqsim、doxndei, itdingh gyau daengz haujlai baengzyoux ndei. Saw couh lumj boux lauxsae ndei baengzyoux ndei ndeu, son gou hagsib, son gou gwndaenj, son gou guh vunz.

(seiq nienzgaep Cinz Nenzsiu)