Ndwencieng hai vabug,

Yied mup de yied rang；

Nienz coit daengz bangx,

Ranzranz angqvauvau.

Ngeihnyied hai vadauz,

Bauqcin mbaj rwi maez;

Youq dwnz go couh maeq,

Ingj roengz deih caez hoengz.

Samnyied duj vavengj,

Yawj lengqlengq cungj hai;

Gij dujlup caen gvai,

Duj hai lengj dahraix.

Seiqnyied hai va’gva,

Nga’nga cungj bin caez;

Aen hung nem aen saeq,

Bwnhfoed caeh demsou.

Nguxnyied vahaeuxyangz,

Lingzdang gwnz ngeiq bin;

Yied yawj yied mizyinx,

Rumz ci mbinfefe.

Loegnyied hai va’mbu,

Bulu youq gwnz raemx;

Mbawmbu maj ndaej aem,

Raemh ndit hawj bya caemz.

Caetnyied vamauxdan,

Hai rim ranz rim lueng;

Bouxlawz raen cungj muengh,

Gaej bae duengh dauqma.

Betnyied hai vahaeux,

Yawj mbaeu hoeng cungj miz;

Dujduj cungj dwg iq,

Rumz ci hix mbouj loenq.

Goujnyied vafuzyungz,

Soengyungz hai doh mbanj;

Bouxvunz ndwn youq banz,

Sim van diemz ndaw hoz.

Cibnyied vagieng hai,

Baizlala henz hangz;

Haeujok nyouq va rang,

Laux coz angq youh haenh.

Cib’it nyied vagut,

Mbwn nit duk de hai;

Gij duj dwggyaez lai,

Mbouj lau ngaiz rumz ci.

Cibngeih nyied vamaenj,

Hai lumj ngaenz hausak;

Bi daengz byai hong sat,

Caezgya ak gvaqcieng.

（Namzningz Si Minzyijveij hawj fwen）