Roeg deng gyaeng youq loengz,

Bak ungj mbouj lumz ciuz.

Miz saek mingh hix ndei,

Bouxvunz wng rox angq.

Mbwk:

Vit lwg youq ranz vunz,

Hix nanz baenz doxgaiq.

Yied siengj sim yied naiq,

Genbuh daiq raemxda.

Ngeix ndaej fouzvangvang,

Mbouj ndaej langh vuenyungz.

Nyaz mingh gag ienq mbwn,

Mbouj baenzvunz dahraix.

Sai:

Boh haq lwg hawj vunz,

Muengh ndaej laexdingh lai.

Seiziq hawj nuengx daiq,

Lwg rwix gvaiq bouxwnq.

Mbouj dan mwngz mingh yaez,

Lajmbwn vunz fouzsoq.

Mbouj ndaej langh vuenyungz,

Nuengx hix gaej doeknaiq.

Mbwk:

Ienq cien loeng fanh ca,

Faex maj youq bangxdat.

Mbouj bae boh youh ndat,

Aj bak raemxda roengz.

Nuengx baenz lwg bya’ndoek,

Doek haeuj aen daemz boengz.

Siengj lai dwgrengz lai,

Nyienh dai hoz mbouj gat.

Sai:

Gaej ienq loeng ienq ca,

Baenzgya hix yungzheih.

Mbwn miz daengngoenz ndongq,

Cij fukheiq caengz daengz.

Vunz ranz youq doxhuz,

Caizsaenz mbouj nyienh liz.

Vah ndaw hoz danqnai,

Hawj nuengx haemh gag ngeix.

Mbwk:

Rin doek raemx nanz yaeuq,

Ngaem gyaeuj cuengq sing gyangz.

Gvanbaz ndaej doengz ban,

Goj ndaej caemh gvaqciuh.

Diendeih faen mbouj bingz,

Song vunz vah mbouj dingj.

Langh ndaej boux doengznienz,

Gwn raemxliengz hix van.

Sai:

Aeu fwnz rox aeu haz,

Couh ra go maj mwn.

Mingh seizneix gaenq dingh,

Lij bae ienq gijmaz.

Mboujlwnh ndei rox rwix,

Vunz dwgrengz bae lix.

Ienq bet cih nienzgeng,

Caengz seng goj sienduenq.

Mbwk:

Gaem mauh ok dou ranz,

Sou numj gangj goj aiq.

Dwen daengz hoz mbouj haih,

Gag doeknaiq cibfaen.

Dwen daengz youh ienq mbwn,

Yied siengj sim yied fouz.

Aeu nyawh bae boiq rin,

Caen siengsim dahraix.

Sai:

Ndei rwix vunz cungj raen,

Gaej gangj aen doeknaiq.

Mizsim caux seiqgyaiq,

Va baih goj lij hoengz.

Bouxvunz miz maqmuengh,

Diegsa bienq diegnywj.

Ruz hung daengz laj dan,

Miz ngoenz ban hwnj raiq.

（caengz sat）