Miz ngoenz he, Vangz lauxsae hawj dou guh baez caencingz caeksawq he, baez caeksawq neix, sawj gou roxnyinh daengz, vunzvunz cungj yaek insik sengmingh, insik vunzcaen swhgeij.

Lauxsae heuh dou sij haj boux vunz swhgeij ceiq gyaez haenx. Gou sij daxboh、daxmeh、yahdaiq、goengda caeuq dahcej. Lauxsae youh sing hung naeuz:“Aen goj daih’it hai- nduj!” Lauxsae hainduj gangj gojgaeq: “Gyajsiet vunz ndaw ranz miz boux he bae lijyouz, naengh aen feihgih haenx oksaeh lo, vunzcaen deng nanh lo.” Gangj sat le, lauxsae sing naekcaem naeuz:“Cingj mwngz daj gij coh mwngz sij haenx ca bae boux he.” Ndaw gyausiz sawqmwh caemrwgrwg. Gou yawj gij coh gou sij haenx, mbouj rox ca bouxlawz bae ndei, doeklaeng gou ca dahcej bae.

Lauxsae hainduj gangj aen goj daihngeih: “Gyajsiet boux vunzcaen he naengh hojceh bae Gvangjcouh guh seng’eiq, doeklaeng hojceh oksaeh lo, vunzcaen deng nanh dai bae lo.” Youh daengz ca bae boux vunzcaen he, aennaj vunzcaen lumj youq baihnaj gou nei, gou fwngz saenzdedded ca daxboh bae.

Aen goj daihsam hainduj lo: “Song boux vunzcaen youq Yinznanz guh seng’eiq, song boux de naengh aen banci hai youq gwnz lohbya, doekfwn lo, lohbya raeuzrwd, banci deng byoek roengz dat bae, boux vunzcaen he dai bae, boux he deng sieng naek.” Gou sawqmwh daej lo, gaiqfwngz saenzdwddwd ca yahdaiq caeuq goengda bae. Moix ca boux he, sim gou couh lumj deng cim camz nei, roxnyinh swhgeij lumj bouxgajvunz nei gaj dai gyoengqde. Haujlai doengzhag hix daej lo. Lauxsae youh gangj: “Vunzcaen deng sieng haenx yw geij bi le, yw mbouj ndei hix dai bae lo.” Geij aen coh neix cij lw daxmeh lo, aengoj laebdaeb: “Boux vunzcaen doeklaeng vih gouq boux lwgnyez doekraemx hix vutmingh lo.” Couh yaek ca daxmeh bae lo, seizde gou roxnyinh mbwn raemh mbwn laep. Cij dingqnyi lauxsae naeuz: “Gyoengq doengzhag, gaej yousim, gij vunzcaen mwngz lij ndangcangq lix dwk, sou moix ngoenz cungj yawjraen gyoengq- de. Yienznaeuz ngoenzneix raeuz caeksawq haenx dwg cungj guhcaemz he, hoeng hawj raeuz roxdaengz le wnggai insik sengmingh, insik moix boux vunzcaen henz ndang raeuz!”

Sengmingh dinjded, dijbauj, hawj raeuz insik sojmiz henz ndang raeuz ba!

(roek nienzgaep Luz Yasinh)