Go gyaez angjak, gij saeh bouxwnq mbouj gamj guh haenx gou gamj guh, gij saeh bouxwnq siengj mbouj daengz haenx gou siengj ndaej daengz. Gou caet bi couh rox bin faex, bet bi couh rox apraemx, mbon rongzroeg, gyongz rongzdoq gou cungj guh gvaq, gij saeh epbya doek roengz daemz bae cungj miz, hix aenvih yienghneix hawj daxboh daxbeh dem le mbouj noix mazfanz.

Geiq ndaej miz baez ndeu, gou caeuq daxmeh bae ranz daiq. Gou ngamq daj baihrog guhcaemz haeuj ranz, raen youz ndaw rek ranzdajcawj hoenzfoedfoed, gou gag siengj dai lo, danghnaeuz feizcoemh couh cuet lo. Aenvih neix dwg aen cauqdoj lajmbanj, henzde miz haujlai fwnz caeuq nywj, gig yungzheih dawzfeiz. Youq seiz gaenjgip neix, gou siengj daengz swhgeij dwg bouxsai dandog ndaw ranz, yinvu ndaepfeiz couh doek youq gwnz ndang gou lo, gou siengj daengz youz dwg mbouj ndaej aeu raemx daeuj ndaep, feiz dawz aeu miz yangjgi, aeu doxgaiq daeuj gek couh ndaej lo. Deng, mbouj dwg miz vunz aeu denz daeuj gouqfeiz ha? Gou siengj hix mbouj lai siengj, sikhaek buet haeuj ndaw rug bae, dawz fandenz couh buet okdaeuj. Haeuj ranzdajcawj bae, yahdaiq cingq youq gizde, gou nyoengx de gvaq henz bae, dawz fandenz goemq roengz rek bae. Cij dingqnyi yahdaiq “a” sing he, gou ganjgip lwnh de: “Daiq, seizneix mbouj miz maz saeh lo, feiz dawz mbouj hwnjdaeuj lo.” “Mwngz guh gijmaz ha? Gou hawj youz ndaw rek ndat le cauj byaek, mwngz……mwngz……aeya, fandenz gou ha!” Gou doeksaet dwg aj bak ngaungau……

Ngoenzhaenx, daxmeh youh son gou haujlai, danhfanz guh saeh gaxgonq itdingh yaek lai siengjsiengj, lai camcam, gaej caiq angjak lo.

(seiq nienzgaep Vangz Yinoz)