Ndwen 8 ngoenz 30, youq Aen Cungsim Hoizguh Denyingj Minzcuz Vunznoix Guengjsae Denyingj Cizdonz Ginhsiu Yauzcuz Swciyen bouxyienj cingq yungh Vahyauz hoizguh denyingj 《Yaengx Fwngz Hwnjdaeuj 2——Gyaep Hoenx Ahdohvanz》.

Itcig daeuj Yauzcuz miz vah bonjfaenh, hoeng mbouj miz faenzsaw, riengzdwk seizdaih bienq、vanzging bienq、vwnzva baihrog yingjyangj, swnjcienz Vahyauz deng yingjyangj gig hung, seizneix miz mbangj mbanj Yauzcuz gaenq mbouj gangj Vahyauz、vunz rox gangj Vahyauz yied daeuj yied noix. Ginhsiu Yenveij、Yen Yinzminz Cwngfuj gig yawjnaek gij cingzgvang swnjcienz Vahyauz, vih swnjcienz caeuq baujhoh Vahyauz, iugouz gak bouhmonz aeu fatok ciznwngz bonjfaenh, cujciz Vahyauz haeuj hagdangz, hailaeb aenban son’gyauq Vahyauz、cujciz soucomz caizliuh Vahyauz、 ingj denyingj Vahyauz、hoizguh denyingj Vahyauz daengj hengz lai diuz roen.

Ciuq cam rox, bi 2009 daengz seizneix Ginhsiu gaenq hoizguh 《Cied Lienh Vangzhoz》《Cung Ok Yamajsin》《Yaengx Fwngz Hwnjdaeuj》 daengj haj bouh benq, doenghgij benq hoizguh baenz Vahyauz neix binaengz youz denyingj gunghswh daengz Mbanjyauz cuengqingj 200 ciengzbaez doxhwnj, ndaejdaengz vunzlai Yauzcuz haenhndei, bineix youh hoizguh 《Yaengx Fwngz Hwnjdaeuj 2——Gyaep Hoenx Ahdohvanz》《Betcib Ngeih Boux Bouxak Liuzlauj- cangh》.

(Bangz Yaujvaz/庞晓华)