Ndwen 8 ngoenz 29, Swcigih cujsiz Cinz Vuj cujciz Aenhoih Cangzvu Daih 103 Baez Swcigih Daih Cibngeih Gaiq Yinzminz Cwngfuj, saemjlwnh le 《Diuzlaeh (Caujan) Hong Saw Vah Minzcuz Vunznoix Guengjsae Bouxcuengh Swcigih》, caemhcaiq gietdingh daezcingj Aenhoih Cangzvu Swcigih Yinzda saemjlwnh.

Vih gyaak hong saw vah minzcuz vunznoix gih raeuz, baujcang gij gienzleih gak minzcuz vunznoix yungh caeuq hwngfat saw vah minzcuz bonjfaenh, gohyoz baujhoh caeuq hwngfat saw vah minzcuz vunznoix, doidoengh vwnzva gak minzcuz doengzcaez hoenghvuengh, Swcigih Yinzminz Cwngfuj bi 2017 hong laebfap dajveh aeu 《Diuzlaeh Hong Saw Vah Minzcuz Vunznoix Guengjsae Bouxcuengh Swcigih》liedbaenz gij fapgvi hanghmoeg deihfuengsingq bineix guhsat haenx. ciuq hong laebfap dajveh iugouz, Swcigih Minzyijveij ginggvaq haeujlaeg diuyenz, yiendaeuz hwnjgauj le 《Diuzlaeh(Caujan Gaujsoengqsaemj)》; Swcigih Fazciban ciuq iugouz guh laebfap saemjcaz, cujciz Swcigih Minzyijveij haeujlaeg haiguh laebfap diuyenz, yiengq gihciz mizgven bouhmonz caeuq laeb gih si yinzminz cwngfuj cam aeu yigen, ciuhai aenhoih lauxhangz lwnhcingq, cungfaen aeundaej mizgven fuengmienh yigen le, doiq 《Diuzlaeh(Caujan Gaujsoengqsaemj)》 guh coihgaij laebndei, guhbaenz le 《Diuzlaeh(Caujan Gaujsaemjcaz)》, bauq Swcigih Yinzminz Cwngfuj saemjlwnh.

Ciuq cam rox, dangguh gih raeuz bouh daih’it fapgvi deihfuengsingq saw vah minzcuz, 《Diuzlaeh(Caujan)》 ciuq 《Fap Gagguenj Gizdieg Minzcuz Cunghvaz Yinzminz Gunghozgoz》《Fap Saw Vah Guekgya Cunghvaz Yinzminz Gunghozgoz》daengj, giethab gij saedsaeh hong saw vah minzcuz vunznoix gih raeuz seizneix, ciuq cungjcwz、hagsib caeuq yungh、yenzgiu caeuq baujhoh、 faplwd cwzyin、fucwz daengj haj aen fuengmienh daeuj gougya, daj doigvangq Sawcuengh Vahcuengh、hwnjguh gveihfanva biucinjvaq、 gij iugouz son’gyauq song vah、 ciennieb caeuq gocwngz anlaeb、 songyauq lauxsae、 ganbu hag song vah、 gveihfan doengzseiz yungh Sawgun caeuq Sawcuengh、saw vah minzcuz yungh youq gunghgung fuzvu gihgou、ciuloeg gunghvuyenz、fanhoiz faenzsaw、gungganq vunzcaiz、yenzgiu raiz faenzcieng、faplwd cwzyin daengj fuengmienh doiq hong saw vah minzcuz vunznoix gih raeuz guh laebfap, caj Aenhoih Cangzvu Swcigih Yinzda saemjlwnh doenggvaq doeklaeng fatbouh hengzguh.

(Veiz Siugvanh Cangh haij- yingh)