Roxnaj mboujcaengz ndaej rox coh,

Lumj ndiu lumj loq daeuj doxraen.

Mbwn laep fwnmoenq doek ndaej haen,

Aen coh caengz han youh aeu dauq.

Song raeuz caez youq ndaw singz laux,

Byawz mbouj lau lauq ngoenz gvaq ngoenz.

Miz hoengq caiq iu youq henz roen,

Youh siengj cam coenz heuh maz coh.

Couhcinj gingj cin raeuz ngonz doh,

Gai gaeuq suen moq hix youz bae.

Gingjsaek baihnaj lumj raemx lae,

Cam coh mbouj ndaej naj mbang lai.

Doxraen doxiu nyap yaek dai,

Song baez cungj sai ngoenzndwen neix.

Siengj rox lau cam gag simheiq,

Roxnaj mbouj ndaej geiq coh mwngz.

Cij rox vunz haenx youq ndaw singz,

Ci daeuj daeng nding mbouj ndaej yiet.

Hwnj vangj doxrox cibngeih nyied,

Gak miz saehnieb mbouj doxgyau.

Couh lumj meuzdiet mbouj gamj naeuz,

Dangnaj yaek aeu gangj ok bak.

Fwnmoenq ceh vunz engq singjsag,

Nyinh gou ndaej ra mingzcoh mwngz.