Guh seng’eiq bonj sieb,

Bietdingh mbouj miz naj;

Deng ma ndaem reihnaz,

Raemxda laelingling.

Siengj gomiuz maj aem,

Aeu yunghsim ndaem naz;

Vid vaq daengz goekga,

Hoeng byajraez fwn doek.

Seiq diemj geij hwnqcongz,

Youh guh hong bae reih;

Guh daengz ngoenz laep seiz,

Cij ngeix dauq bae ranz.

Daengngoenz baez okdaeuj,

Fwngz saeuj mbouj miz rengz;

Ga unq ndang youh beng,

Hoeng lij deng dajndaem.

Guh nungzminz sinhoj,

Hanh soh laeyaengyaeng;

Daengngoenz rongh lumj daeng,

Dak ndaej laeng buh dumz.

Seizcin youh dauq ma,

Gwnz bo rumva hai;

Boux vunz cungj miz dai,

Hongnaz baiz mbouj sat.