Mbwk:

Siengj mbouj ok sawcih,

Gag gwnheiq simfanz.

Souhnanz youq gwnz ndang,

Guh sam mbouj baenz seiq.

Buenxdoih ganq miuz cin,

Daeuj lajmbwn uengjfeiq.

Hoznyap mingh mbouj gviq,

Raemxda laeyamyam.

Sai:

Gaem bit sij sawcih,

Gaej gwnheiq simfanz.

Cog diendeih hai langh,

Nuengx mbouj raen mbwn gvangq.

Fukheiq lij youq laeng,

Gaej gangj dwg uengjfeiq.

Mbouj gangj aen doeknaiq,

Siengj fuk mbouj lau laeng.

Mbwk:

Eu daengz coenz daihngeih,

Gag gwnheiq miumiu.

Doih riu gou hix riu,

Sim ciu duzmaz rox.

Siengj gvangh raemx lizbae,

Lau daisieng uengjfeiq.

Haemh ninz youh mbouj ndaek,

Gyaeuj naek ndang fouz rengz.

Sai:

Vanz daengz coenz daihngeih,

Gaej gwnheiq miumiu.

Hab gangj riu hix riu,

Sim ciu duzmaz lawh.

Nuengx baenz boux nyaeb baiz,

Mbouj ngawz gwih duz lawz.

Cijaeu lij doz ndaej,

Duz lawz cungj dwg ndei.

Mbwk:

Eu daengz coenz daihsam,

Sim gag fanz fouz fap.

Hwnzngoenz gwq hojsouh,

Baenz bingh cij ndaej gyangz.

Langh mbouj ndaej hoizheiq,

Goulau dai bae gvaq.

Yawj gwnzmbwn bouxsien,

Fouz bingh mbouj yungh yw.

Sai:

Vanz daengz coenz daihsam,

Gaej bae fanz baenzlai.

Nienzgeng mwngz lij ningq,

Dingq go menhmenh gangj.

Sinhoj mbouj geij nanz,

Gwnzmbwn cungj rox yawj.

Boux vunz cijaeu gaenx,

Ranzhaz hix cang gim.

Mbwk:

Laj bya bungz mouraih,

Haeb fwngz mbouj ok lwed.

Siengj daengz byaek caengz rwed,

Genbuh uet raemxda.

Dwen daengz hoz mbouj gat,

Aj bak ienqmingh hoj.

Buenxdoih byaij loh rin,

Aen sim cungj mbouj yied.

Sai:

Raih haeb mbouj miz lwed,

Ngeix daeuj sieng mbouj naek.

Gaej cungj dwg gwnheiq,

Fuk goj lij youq laeng.

Daengzcog ndaej bouj dauq,

Nuengx gaej gwq siengj loeng.

Boux vunz aeu miz muengh,

Gaenx guh saedceij ndei.

Mbwk:

Cwzyin gwed youq ndang,

Sing gyangz youh sing ienq.

Mingh maz baenzneix yaez,

Song fwngz cungj fouz ngaenz.

Ndaw ranz byouqlanglang,

Haeux yaek mbouj gaeuq gwn.

Ok dou mbouj aeu daep,

Vunz daeuj caeg huq maz?

Sai:

Naeuz nuengx gaej gwnheiq,

Ndwenngoenz angqyangz lai.

Saeumwnz ndwn baenz soh,

Baenz rwix sim gag rox.

（caengz sat）