Ngoenzhaenx, dingqgangj ndaw sinhvaz suhden daengz buek saw《Siujhagseng Cozvwnz Senj》 he, gou angq dwk youh saet youh diuq, aenvih bonj saw neix gou muengh haemq nanz lo.

Banngaiz, gou lienz haeux hix goq mbouj ndaej gwn, couh gwih danci bae sinhvaz suhden. Gvaq yaep he, gwnz mbwn bienq ndaej raemhcubcub, fwj ndaemndatndat. Gou rox yaek doekfwn lo, gou gag siengj, byaij daihloh beij byaij loh’iq gyae, gou youh mbouj dawz liengj, byaij loh’iq vaiq di. Caen dahraix, daengz buenq loh couh doekfwn lo. Loh’iq gumzgumz gamxgamx, danci gig nanz gaem ndaej bingz, doeklaeng gou caeuq danci caez laemx roengz naz henz loh bae lo. Go’gyaj deng gou dimz ndaej ngeng bae ngeng dauq, gouh- haiz moq gou hix uq ndaej mbouj baenz yiengh lo. Cawx saw youqgaenj, gou benz hwnjdaeuj laebdaeb gwih ci bae sinhvaz suhden.

Dauqdaej cawx ndaej bonj 《Siujhagseng Cozvwnz Senj》 lo. Byaij ok diemqsaw, fwn engq hung lo. Gou lij ciuq loh daeuj haenx dauqma. Byaij daengz henz naz haxbaenh gou laemx haenx, yawjraen dah niq 10 bi baedauq he youq ndaw naz, cingq fuz gij gyaj deng gou dimz haenx hawj cingq. Gou mumjgyumq dingqnyi de naeuz: “Dwg byawz baenzneix dwgcaengz ha, dawz gij gyaj ranz gou dimz laemx couh suenq lo, baenzlawz hix mbouj bang fuz cingq ne? Heiqndat lai lo!”

Gou youq henz najmong dwk ngaem gyaeuj roengzdaeuj. Daj mwh haenx hwnj, gou guh saeh caiq hix mbouj simgaenj simgip lo.

(roek nienzgaep Ciz Cingzvwnz)