Mboengqneix, 《Ceksaw Doz Vahyauz Gunghcwngz》 youz Gungh- cwngz Yauzcuz Swciyen Minzcuz Swvu Guenjleix Giz bien raiz haenx yaenqguh sat, yaek dangguh cek sawsonhag gyoengq boux ganbu vunzlai caeuq bouxgyaez Vahyauz aen yienh neix hag Vahyauz, faen soengq daengz gak hingzcwng saehnieb danvih、 yanghcin caeuq cungh siuj hagdangz daengx yienh.

Aen yienh neix ndaw gyaiq miz vunz Yauzcuz 18.26 fanh boux, ciemq 60.09% vunz daengxcungq daengx yienh, gangj Vahyauz cujyau faen baenz Vahmenjyij Gosanhyauz caeuq Vahyauz Diegbingz(Vahyauzdoj Dieg- bingz、Vahbaujging), seizneix daengx yienh boux rox gangj Vahyauz miz 5 fanh boux baedauq, gaenq mbouj daengz sam faenh cih it vunz Yauzcuz daengx yienh. Vih gujli gyoengq ganbu vunzlai hag Vahyauz, gyaak hong doigvangq caeuq yungh Vah- yauz, youq daengx yienh cauxok gij heiqfaenh ndei gyaez Vahyauz、hag Vahyauz、gangj Vahyauz, aen yienh neix cujciz Aen Yozvei Yauz ndaw yienh youq bi 2016 ndwen 12 guhsat hong bien raiz 《Ceksaw Doz Vahyauz Gunghcwngz》, youq bineix ndwen 7 hawj Yanghgangj Swjginghvah Cuz- banjse yaenqfat oksaw.

《Ceksaw Doz Vahyauz Gungh- cwngz》 gungh soucomz danhswz caeuq vahdinj 440 lai aen(coenz) vunzlai Yauzcuz dangdieg youq ngoenznaengz guh hong gvaq ndwen- ngoenz yungh haemq lai haenx, aen swz ndeu mbaw doz ndeu, youz Banz Meijvah fuveicangj Aen Yozvei Yauz Guengjsae biu yaem Vahyauz, caemhcaiq boiq yungh Vahbujdungh Vahgun ciuq Vahyauz fatyaem, hawj bouxdoeg doiqciuq gyoep doeg, saw doz caemh miz, genjdanh hag ngaih. Doengzseiz, aen yienh neix lij ciuq ceksaw doz bienbaiz gonqlaeng, youz yienh gvangjbo densidaiz doengzyamq loegguh le 23 geiz sibinz sonhag Vahyauz. Yungh Soujgih sauj wveiz- maj fungdaej ceksaw doz couh ndaej yawj. Aen sibinz sonhag Vahyauz neix gaenq daj bineix ndwen 3 hainduj youq Gunghcwngz densidaiz faen geiz boqcuengq.

(Moz Yaujhanz/莫晓娴)