Ngeih nienzgaep sujgyaj, daxmeh daiq gou bae henzhaij youz.

Ngoenzhaenx dienheiq gig hwngq, yawjraen haujlai vunz youq ndaw haij youzraemx, gou sim doenghyubyub, caen siengj diuq roengz ndaw haij bae youzraemx guhcaemz. Hoeng gou cij ndaej youq gwnz sadan gip gyapbangx, loengh namhsa, aenvih daxmeh mbouj rox youzraemx, de lau gou miz yungyiemj. Mboujgvaq, daxmeh dingj mbouj ndaej gou ngaeq de, doeklaeng doengzeiq gou youq bien raemx guhcaemz.

Gou raek aen gienyouzraemx he, angqvauvau caij gij langhraemx, riengzdwk langhraemx yaep he bongj hwnj gwnz sadan, yaep he youh doiq dauq ndaw haij, gou guhcaemz dwk angqvauvau, mbouj rox seizlawz, gou gyaep langhraemx daengz ndaw haij giz laeg bae. seizde, daxmeh daezsingj gou byaij dauqma, gou lij caengz ganj ndaej gib ndwn hwnjdaeuj, sawqmwh miz baiz langhraemx he dongj coh baihlaeng gou, gou sikhaek deng dongj laemx lo. Langhraemx sawqmwh doiq dauq ndaw haij, gou daengxndang cungj deng raemxhaij dumh lo. Gou lij dingqnyi daxmeh hemq gou, hoeng ndaw bak deng raemx haeuj bak bae, han cungj han mbouj ndaej. Gou siengj youz coh henz hamq, hoeng lumj miz cungj rengz hung he sup dwk gou rag coh ndaw haij. Cingq youq mwh gou ciedmuengh, gaiq fwngz hung he rag dawz gou……

Mwh gou singj gvaqdaeuj, gaenq youq ndaw rungj daxmeh lo. Yawj gij yiengh daxmeh lau dwk naj cungj bieg haenx, gou daej lo. Daxmeh naeuz dwg boux boh’au he gouq gou, danghnaeuz mbouj dwg boux boh’au haenx, gou couh mbouj miz mingh lo, daxmeh hix ienqhoij daengx ciuhvunz lo. Gou got aenhoz daxmeh daej dwk naeuz: “Daxmeh, doiq mbouj hwnj, gou loek lo……”

Baez haenx caen dwg yiemj dai yiemj lix ha, gou cengdi aenvih dam guhcaemz vutmingh lo!

(seiq nienzgaep Cauz Yezyenz)