Miz ngoenz ndeu, gou caeuq daxdaiq bae baijdan gai mak- bingzgoj.

Gai haujlai nanz lo, seng’eiq cungj mbouj ndei. Daxdaiq miz di nyapnyuk lo, couh doiq gou naeuz: “Gou siengj bae dan bouxwnq yawjyawj, mwngz gag gai ndaej lwi?” “Ndaej, dangyienz ndaej!” Daxdaiq lumjbaenz mbouj cuengq- sim, youh naeuz:“Deng lo, aencaengh denswj ……” “Ndei lo, gou rox yungh, mwngz vaiq di bae ba.” Daxdaiq caengz gangj sat, gou couh ciengj gangj. Daxdaiq byaij bae le, gou gag caeg riu, ndaej guh boux lauxbanj iq caencingq lo!

Gvaq yaep ndeu, vunz ciemh- ciemh lai lo. Gou raen daxheiz he daiq dah niq he byaij gvaqdaeuj, couh gipmuengz naeuz:“Daxheiz, cawx di makbingzgoj ba.” Daxheiz raen gou dwg boux lwgnyez he, haenh gou naeuz:“Baenzneix iq couh okdaeuj guhhong ha, caen roxsoq!” Gou dingq le ndawsim gag angq. Daxheiz genj daeh makbingz- goj he, hoeng gou mbouj rox yungh aen caenghdenswj, gip dwk gaeu gyaeuj nyauj rwz. Ai, cij gvaiq gou haxbaenh caeuq daxdaiq gangjboq, mbouj hag caengh. Caeklaiq daxheiz rox yungh, couh son gou.

“Gai makbingzgoj lo! Mak- bingzgoj youh byoiq youh van!” Gou laebdaeb hemq dwk. Seizde, gvaq- daeuj boh’au he. “Gij makbingzgoj neix gaen geijlai cienz?” “Gaen song maenz haj.” Gou han naeuz. “Baenzlawz baenzneix bengz ha? Dan baihhaenx cij song maenz.” Gou naeuz:“Gij makbingzgoj gou caeuq boux haenx mbouj dox- doengz, gij mak gou dwg hungzfusw, van lai bw, gou hawj mwngz cimz gep he.” Gou aeu fagmid cab gep he hawj boh’au cimz. Boh’au cimz le naeuz:“W, van dahraix.” Gangj sat, de couh cawx daeh hung mak- bingzgoj he. Haujlai vunz raen boh’au cawx baenz lai, hix gvaq- daeuj cawx. Baenz gaiq baenz gaiq fwngz ndenq cienz hawj gou, gou cungj nyaengq mbouj gvaqdaeuj lo. Cingqngamj, daxdaiq dauqma lo, de raen gou gai ndaej baenz lai, haenh gou dwg boux rox guh seng’eiq he.

Dang lauxbanj caen mbouj heih ha! Ngoenz he roengzdaeuj, yienznaeuz haemq baeg, hoeng gou bang daxdaiq canh le mbouj noix cienz, yawjdaeuj cij aeu mwngz bae guh, couh miz souhaeuj!

(roek nienzgaep Vangz Cinveih)