Daxboh yaek seiqcib bi lo, hoeng gou cungj roxnyinh de lij lumj boux lwgnyez nei.

Mwh gwn haeux, daxboh cungj dwg genj bae genj dauq, yaep he naeuz byaek daiq ndaengq, yaep he naeuz souh daiq gwd, yaep he youh naeuz haeux daiq geng. Fanjcingq, moix donq haeux de cungj gangj mbouj dingz, lij ciengz dawz haeux- byaek loengh uq daengx daiz.

Daxboh bouxwnq yawj densi itbuen cungj gyaez yawj sinhvwnz roxnaeuz cezmuz dijyuz, daxboh gou cix ciengz caeuq gou yawj dung- vaben, moix baez cungj dwg mienh yawj mienh riu, beij gou lij angq.

Daxmeh mbouj hawj daxboh cit ien gwn laeuj, cijaeu nyouq daengz gwnz ndang de miz heiq ien heiq laeuj, couh gig yiemz simj de. Hoeng daxboh cungj dwg bien haujlai leixyouz daeuj vih swhgeij gangjvah, miz seiz bien gij leixyouz haenx lienz gou cungj mbouj saenq.

Daxboh gyaez gwn saejdaeuz, dou lwgnyez gyaez gwn gijmaz de couh gyaez gwn gijmaz. Engq gvaqbouh haenx dwg de ciengz caeg gwn gij saejdaeuz gou.

Daxboh lij gyaez daej, angq le daej, siengsim le daej, gwn laeuj fiz le daej, mbouj habhoz le daej. Ai, doiq de caen dwg mbouj miz banhfap.

Daxboh baenzlawz couh maj mbouj hung ne? Gou caen maq- muengh de roxsoq, miz gij yiengh bouxsai caencingq he.

(sam nienzgaep Cwng Soz)