Gou miz baez ginglig gig daegbied he——“ndonj” haeuj ndaw 20 maenz ngangz bae. Mwngz itdingh gig geizheih, mbawngaenz baenzneix iq, baenzlawz “ndonj” ndaej haeujbae ya, gangjboq luba! Gaej gaenj, dingq gou menhmenh gangj hawj mwngz dingq.

Ndaw sujgyaj, daxboh daxmeh daiq gou caeuq daeggo bae Gveilinz youz. Dou bae daengz gunghyenz Bya’ndaengciengh. Dou bin hwnj Bya’ndaengciengh bae, youh youz Dahlizgyangh. Dahlizgyangh seiqhenz miz haujlai goengqbya, yiengh bya gak cungj gak yiengh, gyaeundei dangqmaz! Gwnz dah raemxsaw yubyab, miz geij aen ruz seiz mbouj seiz daj baihnaj vaij gvaq. Seizneix, dou raen gij gingjsaek gizneix gig sugda, lumj youq gizlawz raen gvaq nei. Mwh dou cingq ngeizvaeg, raen miz geij boux bouxyouz gaem mbaw 20 maenz ngaenz cingq beijveh gijmaz. Dou fwt singj lo, laxlawz, gizneix couh dwg gizdieg caensaed aendoz ndaw mbawngaenz 20 maenz dauq daihhaj guek raeuz haenx! Ha, saenzgeiz lai lo, dou gingqyienz youq gyang aendoz mbawngaenz 20 maenz haenx! Gou caeuq daeggo gikdoengh dwk youh saet youh diuq. Haujlai bouxyouz daeuj- daengz gwnz ruz, fwngz dawz 20 maenz ngaenz, doiqciuq gij gingjsaek mbawngaenz ingj siengq. Gou caeuq daeggo hix mbouj cuengqgvaq aen gihvei neix, yungh “fukdoz hungh mbawngaenz” guh gingj, ingj le haujlai siengq.

Youz sat le, gou caeuq daeggo moix vunz fwngz ndeu gaem 20 maenz ngaenz, fwngz ndeu gaem mbaw siengq bonjfaenh, gwnz naj riu lumj va hai nei.

Baenzlawz yiengh, gou mbouj yaeuh mwngz ba? Gou cingqcaen “ndonj” haeuj ndaw 20 maenz ngaenz bae lo. W, dwg giz- dieg caensaed aendoz ndaw mbawngaenz 20 maenz.

(roek nienzgaep Goz Hanlinz)