Ngoenzsinghgiz, gou caeuq dah- cej bae suenmak mbaet makhoj- lungzgoj. Youq gwnz loh, dou cungj cai makhojlungzgoj maj youq gwnz gofaex baenzlawz yiengh. Dahcej naeuz: “Makhojlungzgoj dwg cungj doenghgo golinxvaiz.” Gou baenzlawz siengj cungj siengj mbouj ok gwnz golinxvaiz daengx ndang cungj dwg oen haenx, baenzlawz maj ok makhoj- lungzgoj baenzneix gyaeundei、baenz- neix ndei gwn ne?”

Daengz suenmak lo, gou caj mbouj gib byaij haeuj ndaw bungz hung bae. “Va, benq saeugolinxvaiz neix geijlai hung ha!” Gou nyaenx mbouj ndaej hemq ok sing daeuj. Aenda yawj bae, baenz diuz baenz diuz saeugolinxvaiz dawz rim makhoj- lungzgoj, baenz benq baenz benq saekheu gap dwk baenz diemj baenz diemj saeknding, gyaeundei raixcaix!

Gou ngamq siengj mbaet aeu makhojlungzgoj, fwngz couh deng camz mbat he. Bohlungz ndaemmak ndenq hawj gou fag geuz he, lwnh gou nyi, mbaet makhojlungzgoj yaek dawz geuz daeuj daet, mwh daet mbouj ndaej yungh rengz lai, mienxndaej daet vaih mbaw de. Gou gig siujsim daet aen makhojlungzgoj he. Yawj aen makhojlungzgoj nding’yanyan neix, gou cungj sij mbouj ndaej cuengq fwngz. Aenmak baenzneix hung, haj roek aen couh coux rim aenswx lo. Itcig gungj aenhwet mbaet mak, caen miz di naet ne, baez mbouj siujsim, fwngz youh deng camz lo, faggeuz hix daet mbouj swnh fwngz lo.

Bohlungz ndaemmak cingj gou gwn makhojlungzgoj, gou mbiq naeng bae, nohmak hamz raemx gig lai, saek mak ronghsien, ndaw nohmak sieng miz gij ceh lumj lwgraz ndaem nei. Gou haeb gwn aenmak, van raixcaix, lij miz cungj feih hom he. Gou fatyienz aen mak iq daegbied ndei gwn, gou mbat ndeu couh gwn le sam aen. Gij makhojlungzgoj neix dwg gou gwn gvaq ceiq ndei gwn haenx.

(roek nienzgaep Cuh Cwnzyij)