Bi’gvaq hanzgyaj, gou moix ngoenz youq ranz mbouj dwg dwk dennauj youzhi couh dwg yawj densi. Miz ngoenz ndeu, daxmeh doiq gou naeuz:“Mwngz ngoenz- ngoenz dwk dennauj youzhi, aenda yawj doxgaiq couh bienq ca, youqgaenj ne couh dafangz bw.” Gou mbouj dingq haeuj rwz. Daxmeh naeuz:“Raeuz daeuj guh- caemz caenndang ginglig boux- dafangz ba, hawj mwngz rox- daengz yawj mbouj raen dauqdaej baenzlawz yiengh.” Gou siengj cungj guhcaemz neix itdingh gig mizyinx, couh dapwngq lo.

Daxmeh dawz gaiq baengz na he daeuj goemq aenda gou, heuh gou bae gaeb de. Guhcaemz hainduj lo, gou lumj duznengz mbouj miz gyaeuj nei, dauqcawq luenh byaij. Aeya, baez mbouj siujsim, aen’gyaeuj gou bungq deng aen’gvih lo, gou sawqmwh gamjdaengz gyaeujngunh dava. Gou nunu giz in, dingh aensim, laebdaeb byaij bae naj. Miz gij hit haxbaenh le, gou moix byaij yamq he cungj gig siujsim, lauheiq youh bungq deng gizlawz. Gou sien iet gaiq ga bae naj, caiq iet song fwngz bae naj, lumhlumh miz mbouj miz doxgaiq dangj baihnaj. Seizde gou lumj youq ndaw gyanghwnz laeprau haenx byaij loh.

Gou fwngz rex bangxciengz, menhmenh byaij, sawqmwh dingq- nyi baihlaeng miz sing byaij loh, lumj dwg daxmeh youq baihlaeng byaij. Gou riengjret baenq ndang gvaqdaeuj, baez vax couh vax daengz gijmaz doxgaiq lo. Gou gag siengj daiq ndei lo, gou gaeb dawz daxmeh lo. Hoeng, gou baez lumh, roxnyinh mbouj deng, gej gaiqbaengz goemq da roengz yawj, laxlawz dwg mbaenq faex gwnz eij.

Doenggvaq baez guhcaemz caenndang ginglig bouxdafangz neix, gou roxdaengz bouxdafangz mbouj yungzheih, roxdaengz le yaek seizseiz haeujsim baujhoh aenda swhgeij.

(ngeih nienzgaep Gungh Swjhwngz)