Heiqci caeuq danci cungj dingz youq aen ranzdingzci ndeu.

Miz ngoenz he, bouxcawj hai heiqci bae youz doxdauq, couh hai heiqci haeuj ranzdingzci coq lo. Bouxcawj ngamq byaij okrog, heiqci couh hainduj angj hwnjdaeuj lo:“Ai! Aen danci deng yo youq gungx, mwngz yawjyawj gou, daengx ndang gyaeundei, iengjsaksak. Bouxcawj naengh hwnj- daeuj cwxcaih dangqmaz, bae gizlawz youh vaiq.”

Danci siengj caeuq heiqci doxceng, hoeng de fwt ngeix hwnj daxmeh de naeuz coenz vah gvaq: Moix boux vunz cungj miz ndeicawq caeuq loengcawq, aeu lai yawj giz ndeicawq bouxwnq. Baenzneix danci couh sim cingh sing unq dwk doiq heiqci gangj:“Daxgo heiqci, gangj bouxlawz hai ndaej vaiq caeuq naengh bouxlawz ndaej engq cwxcaih, song yiengh neix gou mbouj beij mwngz. Hoeng, gou hix miz gij ndeicawq gou!” Danci gangj sat, couh mbouj ok sing, hix mbouj dam heiqci lo.

Doeklaeng miz ngoenz he doekfwn, gwnz roen cungj dwg heiqci, bouxcawj naengh youq ndaw heiqci gig nanz hix ning mbouj ndaej saek di. Ndawsim bouxcawj gip raeuh, siengj dauq ranz vaiq di. Seizneix, danci couh gag hai gvaqdaeuj, bouxcawj daj ndaw heiqci okdaeuj, daenj ndei buhfwn yaek hai danci bae ranz lo.

Heiqci raen lo, najmong ndaej ngaemgyaeuj roengzdaeuj. Bouxcawj doiq heiqci naeuz:“Gou okdou cungj aeu hai mwngz roxnaeuz danci, doiq gou daeuj gangj, sou cozyung doxdoengz caemhcaiq goenglauz mbouj faen byawz hung byawz iq.”

Daj seizhaenx hwnj, heiqci caiq hix mbouj gamj dasang lo, caeuq danci doxbang doxrex, roengzrengz fuzvu bouxcawj, lij baenz baengzyoux dem.(ngeih nienzgaep Vangz Binh)