Goengmou、buzmou haici daiq Beigiz caeuq Gyauzci ma ranz, youq gwnz loh gyoengqde yawjraen aenbouq binghgihlinz duzdouq siujcej gai haenx. Buzmou couh gangj, raeuz dingz roengzdaeuj bae cawx bingh- gihlinz ba. Beigiz caeuq goengmou、buzmou cungj senj ndei gij bingh- gihlinz gyoengqde gyaez gwn haenx lo, lwnzdaengz Gyauzci.

Gyauzci naeuz：“Gungj——nungz

(lungz)!auau!”

Duzdouq siujcej couh naeuz:“Gou yawj Gyauzci siengj aeu aen heiqgiuz gungjlungz bw.”

“Ndei ba.” Goengmou naeuz, “Geijlai ngaenz?”

Duzdouq siujcej dap:“Betcib maenz.”

Goengmou roxnyinh bengz lai lo. Mboujgvaq, de lij dwg cawx hawj Gyauzci lo.

Duzdouq siujcej youh naeuz:“Gaem ndei bw.”

Gyauzci baez soengfwngz, aen heiqgiuz couh mbin doxhwnj lo.

Goengmou couh vaiqdangq gaem dawz diuz mae lamh heiqgiuz haenx. De naeuz:“Gyauzci, aen heiqgiuz neix baenzlai bengz, gou bang mwngz gaem bae ranz ba.”

Youq rog ranz goengbuz, Gyauzci boenz aen heiqgiuz de.

“Gyauzci,” Beigiz naeuz, “ neix dwg aen heiqgiuz rox mbin, dangh- naeuz mwngz caiq cuengq fwngz, de couh mbin hwnj ronghndwen bae!” “Ronghndwen!” Gyauzci daej lo. De baez soeng fwngz, heiqgiuz mbin bae lo. Caeklaiq goengmou youh gibseiz gaem dawz lo.

Beigiz caeuq Gyauzci haeuj ndaw ranz daeuj, yienghneix heiqgiuz haemq ancienz.

“Bohli, mwngz ndei.” Beigiz gangj,“Gyauzci miz aen heiqgiuz moq he!”“Gva!”Duz roegyengj Bohli heuh naeuz,“Heiqgiuz!” Bohli caeuq Gyauzci ityiengh gyaez aen heiqgiuz neix.

O, mbouj! Heiqgiuz mbin bae lo. De mbin hwnj gwnz laeuz, ndonj haeuj gwnz bam bae.

Beigiz naeuz:“Mbouj lau, youq ndaw ranz mbouj miz saeh.”

Gyoengqde benz hwnj aenlae bae gyaep heiqgiuz.

Buzmou miengj benz miengj gangj：“Mbouj lau, gwnz bam cijmiz giz ndeu ok ndaej bae couhdwg conghcueng. Caemhcaiq conghcueng cungj dwg haepgven ne……”Hoeng baezneix aencueng mbouj haep, heiqgiuz mbin ok rog bae lo.

Beigiz doiq Gyauzci naeuz, heiqgiuz mwngz mbin hwnj rongh- ndwen bae lo. Gyauzci dingq le daej- nga’nga. Couh youq seizneix, bohmou daeuj ciep gyoengqde ma ranz. De hix raen daengz heiqgiuz mbin bae lo, hoeng de hix mbouj miz gijmaz banhfap. Buzmou heuh naeuz, itdingh miz gijmaz banhfap aeu ndaej heiqgiuz dauqma! Duz roegyengj Bohli hemq dwk, heiqgiuz, heiqgiuz! Bohli mbin hwnj gyangmbwn, aeu bak gamz diuz mae lamh heiqgiuz haenx. De couh yienghneix aeu ndaej heiqgiuz dauqma lo. Gyauzci angqhemq: Ndei lai lo, ndei lai lo. Buzmou haenh Bohli coengmingz lai.

Beigiz lwnh Gyauzci mbouj ndaej caiq hawj heiqgiuz mbin bae lo. Bohmou siengj daengz aen banfap ndei he, de dawz aen heiqgiuz lamh hwnj hozfwngz Gyauzci, yienghneix couh mbouj lau heiqgiuz mbin bae lo.

Gyauzci gig simvuen, de gyaez heiqgiuz de, caezgya cungj gyaez heiqgiuz de.

(Ouh Caijfangh hoiz)