Cuengq sujgyaj le, daxboh daxmeh soengq gou bae ranz cejbiuj. Aiq dwg ngamq daeuj mbouj sug ba, daengz ranz cejbiuj ngoenz daih’it, gou guh gijmaz saeh cungj mbouj gangj saek coenz vah, gyoengqde hix mbouj guenj gou. Couh yienghneix, gou moengjmoengj doengjdoengj ngaiz daengz gyanghaemh.

Gou swiqndang hwnj mbonq ninz sei, raen cejbiuj ndaw fwngz gaem bonj saw he, gangj daeuj hix geizheih, bonj saw neix lumj gijgwn ndei gwn nei, hawj gou nyaenx mbouj ndaej caenx hwnjbae. Neix dwg bonjsaw heuh 《Fwjhau Gwnz Bam》, dwg bonj saw cozgyah Bingh Sinh ndaej ciengj haenx. Gou siengj dwg mbouj dwg ciq daeuj yawj geij yieb, mbouj ndei yawj caiq boiz dauqbae.

Cungj ndawsim roxnyinh geizheih neix, sawj gou gangj ok coenzvah daih’it youq ranz cejbiuj haenx: “Dahcej, bonj saw neix ndei yawj lwi?” Cejbiuj gig doeksaet, aiq dwg aenvih gou daujdaej hak bak gangj vah luba. “Ndei yawj ha, mwngz siengj yawj gou couh ciq hawj mwngz yawj, gou bae yawj densi.” “W.” Sing gou gig iq, cix gig angq.

Gou sikhaek dawz hwnj saw, gig mizyinx doeg roengzbae. Mwh gou cingq yawj ndaej yinxdaeuz, sawqmwh dingz dienh lo. Baenzlawz guh? Cejbiuj sikhaek daj ndaw doengjgvih dawz ok labcuk daeuj diemj. Doiq gou daeuj gangj neix caen dwg doek nae soengq danq ha!

Mbwn yied daeuj yied laep, seiqhenz dinghyubyub, mbouj rox mbouj nyinh daengz gyanghaemh cib diemj cung lo. Cejbiuj doiq gou naeuz: “Ninz ndaej lo!” “Gou mbouj raninz, lij singjsag ne!” Gou doep aek gig miz cingsaenz dwk naeuz. “Ndei ba, mwngz laebdaeb yawj ba, gou mbouj lanz mwngz.” Cejbiuj gangj le gag ninz lo.

Mwhhaenx, yubyab yubyab, gou sikhaek daj ndaw denz diuq okdaeuj: “Haha, dienh daeuj lo!” Cejbiuj deng gou hwk lo, ngawzngwd yawj dwk gou.

Gaenq daengz gyanghwnz, daihgya cung ninzndaek lo, gou lij laebdaeb yawj saw. Mbouj rox seizlawz, mbwn rongh lo, gou hix doeg sat bonj saw neix lo. Gou raurumz mbat he, hozrim dwk haep bonjsaw hwnj, haeujninz sisi lo.

Gij saw lajbiengz lumj daihhaij nei hunggvangq fouz bien, gyoengqvunz yungh ciuhvunz de daeuj doeg hix doeg mbouj sat. gou geizheih haenx dwg, bonj saw ndei ndeu, gingqyienz lumj miz fapswd nei, sawj vunz lumz gwn lumz ninz lumz seizgan. Gijneix couh dwg gij yinxdaeuz doegsaw ba!

(roek nienzgaep Vangz Sinhyiz)