Lauxsae senj gou caeuq Lij Yungj doengzhag biujyienj siengswngh. Ciuq lauxsae iugouz, gou caeuq Lij Yungj roengzrengz sinhoj baizlienh, lauxsae gig muenxeiq. Mboujgvaq, lauxsae lwnh dou, youq mwh cingqsik biujyienj, aensing itdingh gangj hung.

Mwh biujyienj daengz lo, aenvih gou caeuq Lij Yungj dwg baez daih’it youq baihnaj daengx hagdangz baenz lai vunz biujyienj, cungj miz di gaenjcieng. Gou sup gaemz heiq hung ndeu, caeuq Lij Yungj byaij daengz gyang daizheiq, couh hainduj biujyienj lo. Ndaw siengswngh miz haujlai gig ndeiriu, hoeng laj daiz singriu cix mbouj lai. Mbouj wnggai dwg yienghneix ha? Gou yawj coh baihlaj, raen haujlai vunz cungj mbouj nyinhcaen dingq, gou gamjdaengz gig saetmuengh.

Biujyienj sat le, lauxsae byaij gvaqdaeuj doiq dou naeuz: “Sou gangj ndaej gig raeuz, biujcingz hix gig ndei, hojsik hoizwngq mbouj ndei. Sou rox dwg gijmaz yienaen lwi?” Song boux dou ngauzngauz gyaeuj. “Aensing daiq iq lo! Sing daiq iq, yaugoj couh mbouj okdaeuj.” Lauxsae coenz ndeu senz daengz ndok naeuz dwk.

Gvaiq mbouj ndaej dou biujyienj baenzneix nyinhcaen, bouxyawj cix mbouj miz maz fanjwngq, laxlawz gyoengqde cungj dingq mbouj nyi ha. Danghnaeuz mehmbwn caiq hawj gou baez gihvei he, gou itdingh fat ok aensing ceiq hung gou daeuj.

(seiq nienzgaep Lij Sunghyui)