Mboengqneix, Ningzmingz Yen Minzcuzgiz youq Cwngzcungh Cin Cuhlenz Cunh Mbanjbanhlungz banh aen haiban yizsi hainduj Ningzmingz Yen “fwen haeuj fanh ranz” cienz eu son’gyauq hozdung. 50 boux bouxgyaezfwen Cuhlenz Cunh caeuq bouxguhhong lijyouz ndaw yienh haenx caeuqfaenh son’gyauq.

Aen ban son’gyauq cingj Ganh Saugwngj boux fwenvuengz、 boux cujsiz aen hezvei fwen ndaw yienh daeuj hwnjdangz, son’gyauq yungh gij hingzsik lauxsae cienz eu、 lauxsae caeuq bouxhag、 bouxhag caeuq bouxhag doiq eu, yungh 《Fwen Coux Hek》《Fwen Haeuj Mbanj》《Fwen Gingq Laeuj》《 Fwen Byaraiz》 daengj fwen Ningzmingz okmingz haenx guh saw guh son’gyauq hoz- dung.

Gwnz dangzgoq lauxsae caeuq gyoengq bouxhag gaenxmaenx doxdoeng, heiqfaenh hoenghhwd, demgya le cingzngeih, vih gyoengq canghfwen daezhawj aen bingzdaiz doxgyau doxhag he, son’gyauq yaugoj yienhda.

Baez son’gyauq hozdung neix yaek guh ndwen he, yamqlaeng yaek bae Yaudaz Cunh、 Nazli Cunh、 Dunglangz Cunh、 Nazlen Cunh daengj guh son’gyauq hozdung, doiqsiengq son’gyauq daih’iek 500 vunzbaez, hawj bouxhag ceiq noix ndaej boih eu 10 hot fwen. Cauh’ok gij heiqfaenh bouxboux gyaez dingq fwen, rox eu fwen, gyaez eu fwen, cienz eu fwen.

(Liuz Yencuh Liu Hihfangh Liengz Funghgwz)