7 nyied 20 hauh banhaemh, Hocouh Si Minzcunghveij、 Minzyijveij youq Fuconh Yauzcuz Swciyen Sinhvaz Yangh Mbanjhuzgvangj mbanjmoq banh denyingj vah minzcuz “minzcuz doxgiet·angqcoux cibgouj daih” haeuj lajmbanj hozdung. Denyingj vah minzcuz roengz mbanj, muzdiz dwg hawj gij cingsaenz vwnzva aeuyungh vunzlai minzcuz vunznoix mboujduenh gyalai haenx ndaej rimhoz, giethab gohgi roengz mbanj, cuengqingj gohgyauben hawj vunzlai minzcuz vunznoix, daezsang gij dinfwngz guhhong nungzyez caeuq naengzlig baenz miz vunzlai, coicaenh hwngfat ginghci ndawbiengz mbanj minzcuz.

Doenggvaq hozdung, bae daengz gak mbanj doiq vunzlai minzcuz vunznoix guh minzcuz cwngcwz caeuq faplwd fapgvi dangj senhconz gyauyuz, roengzrengz vih minzcuz yangh、mbanj soengq raeuj, vih beksingq banh saehndei. Hawj gyoengq vunzlai minzcuz vunznoix roxnyinh daengz dangj yawjnaek vah saw minzcuz vunznoix caeuq hwngfat ginghci minzcuz, roxnyinh daengz gij raeuj dangj.

Ciuq gyoepsuenq, minzcuz vunznoix Hocouh Si cujyau dwg Bouxcuengh、 Yauzcuz guhdaeuz, daengx si vunz Yauzcuz 25 fanh lai boux, mbanj youq daengz 130 lai aen, ndawde miz 72 aen mauhgvaq 1000 boux. Vunz Bouxcuengh miz 8 fanh lai boux, mbanj youq daengz 80 lai aen, ndawde miz 28 aen mauhgvaq 1000 boux. Aenvih aen si neix beixnuengx minzcuz vunznoix Cuengh、Yauz cungj youq diegbya, vwnzva、 ginghci haemq doeklaeng, gaenjbik aeu soengq denyingj vah minzcuz haeuj lajmbanj cuengqingj hozdung.

(Cau Ginhbinh/赵金宾)