Bi haenx gou caeuq daxmeh caez bae ranz daiq, mwhhaenx cingq dwg vadauz hai va. Daxmeh vix aenngaeuz ndaw ndoeng faexdauz naeuz: “Daxdaiq youq gizhaenx ne, de cingq mbaet va, raeuz bae bang daxdaiq.”

Dou byaij bae coh daxdaiq. Gou raen daxdaiq cij mbaet gij va hai ndaej caeux hai ndaej nding haenx. Daxmeh lwnh gou, gij va haenx dwg “vayaeuh”， gij va neix yienznaeuz hai ndaej caeux, hai ndaej nding, doeklaeng cix mbouj dawzmak, sai yangjfwn gomak, mboujyawx mbaet de roengzdaeuj guh faenjva. Aenvih vadauz cijmiz ndaej supaeu faenjva, cij dawzmak youh hung youh van.

Yienghneix baenzlawz cij rox duj lawz dwg “vayaeuh” ne? Daxdaiq naeuz gou nyi, itbuen dujva hai ndaej caeux, hai ndaej daegbied nding haenx couh dwg “vayaeuh”, itbuen nye va he baihndaw couh miz sam seiq duj.

Gou sawq youq ndaw va ra “vayaeuh”. Sawqmwh, gou yawjraen duj “vayaeuh” he lo. Duj va haenx beij gij va henz de hai ndaej hung, dwg duj ceiq gyaeundei ceiq nding, hoeng duj va neix couh lumj bouxvunz gangj yaeuh ityiengh, yaeuh ndaej seiz he, yaeuh mbouj ndaej daengx ciuhvunz, de cawqdingh gig vaiq couh loenq roengz. Ndigah, dauq mboujyawx mbaet de roengzdaeuj, aeu gij faenjva de cienz hawj gij vadauz ndaej dawzmak haenx supaeu.

Mbaet “vayaeuh” hawj gou rox aen dauhleix he: Vunz siengj guh saehcingz gig lai, hoeng cinglig cix miz hanh, cijmiz cuengqroengz gij saeh mbouj youqgaenj bae, ciensim bae guh gij saeh miz yungh haenx, yienghneix cij guh baenz ciuhvunz gyaeundei swhgeij.

(haj nienzgaep Liz Cozyenz)