Lwg noucim siengjmuengh bae baihrog yawjyawj. Dingqgangj laj daengngoenz miz bya heu、raemx saw, henz dah miz va hai gyaeundei, henz gofaex mak baenz haenx miz duz roeggungjcoz mbe gaiqrieng vava loegloeg, roeghenj youq gwnz faex ciengqgo……，ha, lwg noucim itdingh yaek bae yawjyawj gij gingjsaek baihrog, mwhhaenx lwgda de lij yawj ndaej raen.

Lwg noucim angqvauvau buet dwk, ngamq ok bakcongh, meh noucim couh gyaep hwnjdaeuj: “Lwg gvai, mwngz mbouj rox apraemx, doek roengz raemx bae, couh deng mbaet dai bw!”

“Gou wnggai baenzlawz guh?” Lwg noucim dingz roengzdaeuj nyeux gyaeuj cam.

“Ciengeiz yaek siujsim, itdingh mbouj ndaej bae henz dah.”

“Geiq ndaej lo!” Lwg noucim han dwk, yamqdin menh roengzdaeuj lo.

“Lwg gvai, caj yaep ndeu!” Lwg noucim ngamq byaij cib geij yamq, meh noucim youh gyaep daeuj naeuz: “Mak gwnz faex youh hung youh lai, rumz baez bongj couh doek roengz- daeuj, danghnaeuz doek daengz gwnz gyaeuj mwngz, aen’gyaeuj mwngz couh deng dub benj bw!”

“Caen dwglau ha, gou wnggai baenzlawz guh ha?” Lwg noucim lau dwk cam.

“Mwngz itdingh geiq ndaej, danhfanz laj gofaex mwngz gaej byaij gvaqbae!”

Lwg noucim han sing he, menh- menh raih baenaj.

Youh gvaq yaep ndeu, daxmeh noucim daj baihlaeng gyaep daeuj, baegfofo daengq naeuz: “Byaij gvaq diegnywj seiz, yaek siujsim duzyiuh gwnz mbwn; byaij lohbya, lij yaek siujsim duzguk……”

Daxmeh noucim soengq lwg noucim byaij le, ma daengz ndaw congh, lumj bingzseiz nei vat deihgoengq.

Ngoenz daihngeih, meh noucim vat deihgoengq baenaj seiz, caeuq lingh duz noucim vat deihgoengq haenx doxroeb lo. De saiq gij namh bae baez yawj, gingqyienz dwg daeglwg de!

“Lwg gvai, mwngz lij youq gizneix?” Daxmeh noucim youh doek- saet youh angq.

“Dwg ha, meh.” Lwg noucim unqswnh dwk han naeuz, “dingq gij vah ngoenzlwenz mwngz daengq haenx, gou roxnyinh lij dwg itcig youq henzgyawj vat deihgoengq ndei.”

Seizneix, lwg noucim caiq hix mbouj siengjmuengh bae najdeih youz lo. Doeklaeng, aenda de doiqvaq lo, caiq hix yawj mbouj raen saek yiengh doxgaiq lo.

(Linz Cizfungh)